Dyrevernalliansen ja Biebmobearráigeahčču eai vuoruhuvvo 2023 stáhtabušeahtas. Dyrevernalliansen gulahallanjođiheaddji oaivvilda ahte ráđđehussii lea dohkálaš ahte eallit nelgot.
Dyrealliansena stáhtadoarjja unnu 60 000 ruvnnuin. Dat dáhpáhuvvá oktanaga go Noah doarjja sihkkojuvvo, ja ráđđehusa lohpádusat Biebmobearráigehččui eai dihtto.
– Doarjja mii jahkásaččat addo elliidčálgoorganisašuvnnaide ii leat hállanveara. Dan dihte ii leat eahpádusge ahte lea politihkalaš motiiva go eai vuorut elliidčálggu. Mii sávvat ahte Stuoradiggi oaidná man heittot dát lea, ja dattetge juolludit ruđaid elliidčálgoorganisašuvnnaide ja Biebmobearráigehččui, go mii bargat eanandoalu elliidčálgguin, čilge Dyrevernalliansen gulahallanjođiheaddji Live Kleveland, preassadieđáhusas.
Biebmobearráigehččui juolluduvvo unnit go 35 miljovnna ruvnno, mii lea 2,4 proseantta diimmá loguid ektui. Dat dáhpáhuvvá vaikke diibmá 70 anonyma šibitdoaktára celke ahte Norggas ii leat dohkálaš elliidčálgu. Šibitdoaktárat čálle Biebmobearráigehččui ahte váilot resurssat bissehit elliid biinnideami.
Ii leat vuosttaš geardde go ráđđehus mas Guovddášbellodat lea mielde, evttoha unnidit ruđa elliidčálgui.
– Orru nu ahte ráđđehus ii leat ádden man duođalaš dilli lea. Ferte nannet eiseválddiid, ja organisašuvnnaid geat barget elliidčálgguin, čilge Kleveland.
