Ráđđehus evttoha stáhtabušeahtas lasihit ávnnasstipeandda joatkkaskuvllaohpiide 50 miljovnnain ruvnnuin. Ohppiidorganisašuvnna jođiheaddji lea duhtavaš ođđasiin.
– Mii leat hui duhtavaččat go ráđđehus vállje áŋgiruššat eambbo ohppiide, ja lea hui dehálaš dál go ekonomiija lea gáržon, muitala Ohppiidorganisašuvnna jođiheaddji Aslak Berntsen Husby preassadieđáhusas.
Nu mo ávnnasstipeanda lea dál, de dat ii govčča ohppiid dárbbu go galget gárvet oahpuid. Stipeanda ii govčča visot maid oahppi ferte oastit sisa oahpahussii, nu go skuovaid, niibbiid ja eará reaidduid. Muhtin fidnofágain, nu mo mearradoallolinnjás, gos oahppit šaddat logenáre duháhiid mielde golahit vai sis leat dárbbašlaš diŋggat, de ii govčča stipeanda.
– Dát ođas lea buorre buot nuoraidskuvlaohppiide geat háliidit álgit fidnofágalinnjáide, muhto eai leat duostan ekonomiija dihte. Statistihkalaš Guovddášdoaimmahaga loguid vuođul de váilot 2035:s 100 000 fágabargi, nu ahte lea hui buorre go ráđđehus oaidná dárbbu fágabargiide, muhto mii dárbbašit ahte ollásit ruhtadit oahpuid, čilge Husby.
