-Almmuhus-
-Almmuhus-
OĐĐASAT Dutkagoahtán jápmima Leavnnjas

Dutkagoahtán jápmima Leavnnjas

-

-

Oarje-Finnmárkku politiija lea otne álgán dutkat eahpideaddji jápmima Leavnnjas.

Oarje-Finnmárkku politiijaguovlu lea otne álgán dutkat ášši Porsáŋggus, maŋŋel go mannan sotnabeaivvi gávdne muhtin báikkálaš birrasii 50 jahkásaš albmá iežas láigovisttis Leavnnja guovddážis ja lei garrasit roasmmohuvvan.

 

Jámii guovtti beaivvi maŋŋel
Almmái sáddejuvvui Tromssa Universitehta buohccivissui, muhto jámii ikte, navdimis go lei garrasit roasmmohuvvan.

– Mii eat dieđe vuos mii lea geavvan ja mii dutkat ášši eahpideaddji jápmimin. Politiija ii sáhtte muitalit eambbo ášši birra, go ferte vuhtiiváldit dutkama, cealká politiijainspektevrra Britt Solveig Olaussen preassadieđáhusas, man sáddejedje maŋŋebárgga eahkeda.

 

Eai atte eambbo dieđuid

Otne iđitdiimmuin eai sáhttán Oarje-Finnmárkku politiijaguovllus addit eambo dieđuid áššis.

 

Ođđa dieđut

Badjelaš diibmu logis sáddii Oarje-Finnmárkku politiijaguovlu ođđa preassadieđáhusa, gos bohtet eambo dieđut ovdan.
Báikkálaš almmái, gii lei birrasii 50 jahkásaš, gávdnui sotnabeaivvi iežas ruovttus Leavnnja guovddážis ja ledje su bearašláhttut geat gávdne su.
Almmái sáddejuvvui buohccibiilla mielde vuos Hámmárfestii ja doppe viidáset Tromsii, gos maŋŋel jámii.

– Porsáŋggu politiija lea ožžon veahkki Álttá leansmánnikantuvrras taktihkalaš dutkamii. Ikte maŋŋebárgga čađahuvvojedje máŋggat gažadeamit ja stohpu gos almmái gávdnui, lea giddejuvvon dassái go politiija lea čađahan teknihkalaš iskama báikkis, cealká Britt Solveig Olaussen preassadieđáhusas.

Rumašiskkadeapmái
Olaussen čállá maiddái ahte japman almmái galgá otne rumašiskkadeapmái ja politiijat sávvetge sáhttit muitalit dan maŋŋel eambo ahte leago sáhka lihkuhisvuođas, vuoi leago rihkusášši.

– Ođđa preassadiehtu boahtá, go dieđut rumašiskkadeamis gárvánit, loahpaha son.

 

 

Ávvir čuovvula ášši.

 

 

 

 

- Advertisement -
-Almmuhus-