-Almmuhus-
-Almmuhus-
OĐĐASATDrámá duoddaris: Su gean váro­hit bahá­dahkkin, lea dál áššái­duhtton, muhto ii váldon...

Drámá duoddaris: Su gean váro­hit bahá­dahkkin, lea dál áššái­duhtton, muhto ii váldon gitta

-

-

Politiijat leat dutkame ášši mii geavai Goččesjávrris, ja leat dál áššáiduhttan su gean várohit bahádahkkin.

Mannan váhkkoloahpa leat guokte olbmá Goččesjávrri guovllus šaddan gazzalaga, ja dat mielddisbuvttii ahte nubbi olmmái šattai Hámmerfeastta buohccivissui dan geažil.

Ávvira dieđuid mielde lea dan oktavuođas adnon vearju, muhto dan eai duođaštan politiijat ikte, eai ge kommentere dan odne.

Dál lea gillájeaddji addán čilgehusa politiijaide.

Loga maid:
Drámá duoddaris: Dievdu sádde­juvvon buohcci­vissui

Áššáiduhtton

Finnmárkku politiijaguovllu politiijaadvokáhtas Hilde Strømmes lea dál ovddasvástádus dutkat ášši. Son muitala ahte su gean várohit bahádahkkin áššis lea dál áššáiduhtton.

– Mis ii leat áššáiduhttincealkámuš vel áššis, muhto áššis lea stáhtus rumašvaháguhttin, ii ge roavva rumašvaháguhttin, muitala son.

Son muitala ahte gillájeaddjis leat sii odne ožžon čilgehusa, muhto ii áiggo duođi eambbo dadjat mii dan olis lea boahtán ovdan.

– Ášši oktavuođas galgá Ávvira dieđuid mielde vearju adnon dan dáhpáhusa olis. Sáhttibehtet go dan duođaštit?

– Mii eat kommentere mii gillájeaddji čilgehusas boahtá ovdan. Sáhtán duođaštit ahte mii leat duoguštan diŋggaid, muhto duođi eambbo in áiggo dan birra kommenteret, lohká Strømme.

– Lehpet go áššáiduhtton dievddu váldán gitta?

– Mii eat leat váldán su gitta, muhto son galgá ihttin čilget politiijaide iežas beali áššis. Mii leat, dasa lassin go gillájeaddji lea čilgehusa addán, maid gažadan vihtta vihtana áššis. Nu go ášši lea dál, de eat mii atte vuos makkárge dieđuid dan birra maid sii leat čilgen dahje maid gillájeaddji lea čilgen, lohká Strømme.

Ášši Romssa politiijaguvlui

Go dáhpáhus lea geavvan Ráissa suohkanis, de galga Romssa politiijaguovlu váldit badjelassii ášši dutkat viidáseappot.

– Mii bargat álgodutkama, ja dasto gálgá ášši sirdot Romssa politiijaguvlui, gos de galget viidáset dutkat ášši, muitala Strømme vel.

-Almmuhus-