Vuorraset dievdu gárttai buohccevissui maŋŋel johtolatlihkohisvuođa.
Maŋŋebárgga eahkeda dáhpáhuvai johtolatlihkohisvuohta E10 geainnus gaskal Lilleskånlanda ja Elvemo, Dielddanuori suohkanis.
Romssa politiijaguovlu dieđiha X/Twitteris ahte muhtin persovdnabiila lea vuodján lástabiilla njeaiga mii lei orustan. Muhtin vuorraset dievdu sáddejuvvui Hársstáid buohccevissui ambulánssain. Ii leat dihtosis man garrasit son lea roasmmehuvvan.
– Vuorraset dievdu lea biillain beaškkehan oktii lástabiillain mii lei orustan. Mii oaččuimet dieđu lihkohisvuođa birra diibmu 22:09, lohká Romssa politiijaguovllu operašuvdnajođiheaddji Morten Augensen NTB ođasdoaimmahahkii.
Politiijat leat dutkagoahtán ášši. Báikkis gos lihkohisvuohta dáhpáhuvai lea leaktomearri 90 kilomehtera diimmus. Gádjunbiila ferte guktot vuojániid doalvut eret lihkohisvuođabáikkis.
