Gáimmeš-guovttos geavaheaba válgagiččus goabbatlágan vugiid oččodan dihte jienasteddjiid, nubbi «dološ» vugiid ja nubbi ges ođđaáigásaš vugiid.
Gáimmeš-guovttos geavaheaba válgagiččus goabbatlágan vugiid oččodan dihte jienasteddjiid, nubbi «dološ» vugiid ja nubbi ges ođđaáigásaš vugiid.
Kárášjoga Dáloniid Listtu njunuš Nils Anders Rasmus mieđiha, ahte son ii leat geavahan sosiálamediaid, nu go Facebook, instagram, snapchat, Twittera ja nu ain válgagiččus.
– Mun dieđán mii Facebook-siidu lea, go mus lea dakkár. Muhto dan gal in leat geavahan válgagiččus. Mun rahpen gal ikte dan siiddu, ja oidnen doppe ledje boahtán guokte breava. Ledjen leamaš guhkes beaivvi barggus, nu ahte in veadján vástidit. Gal mun lean juo badjel 70-jáhksaš almmái, dadjá Rasmus.
Smart-telefuvdna
Guruha njunuš Nils Nilsen Gaup lea ge badjelaš logi jagi nuorat go gáibmi, nu ahte son lohká iežas geavahan sosiálamediaid ja smart-telefuvnna áŋgirit.
– Mun gal lean jámma politihkken Facebookas. Lean maid sádden vaikke man ollu SMS-dieđuid, dadjá Nils Nilsen Gaup, ja rokkasta lummas bajás stuorašearpmat telefuvnna, mii lea ge smávva dihtormašiidna.
Dáloniid Listtu njunuš Nils Anders Rasmus ii loga alddis eará go boaresáigásaš mobiltelefuvnna mainna ii sáhte eará go jur riŋget ja čálistit teakstadieđuid. Son čájeha ge smávva 1990-logu Nokia telefuvnna.
– Muhto go sámediggeválggat leat guovtti jagi geahčen, de gal áiggun oastit diekkára go gáimmis, lasihastá son.
Válgakaféat
Ávvir deaivvadii ge sudnuin Márkanšalddi kaféas gos odne eahkeda galgá buot bellodagain válgagohcin ovcci rájes. Dáloniid listtus ja Guruhis ii leat válgakaféa nu go earáin leat duoppil dáppil márkanis. Muhto sihke Nils Gaup ja Nils Anders Rasmus leaba juo válgagohcinbáikkis vuorddašeame gussiid.
– Dáppe lea sihke káffe ja gáhkut, dadjá Gaup. Rasmus ges dadjá ahte Dáloniid Listu dat leat ordnestan deike válgagohcima.
– Nu bovdejin deike buohkaid boahtit go ovdagihtii jienaid almmuhišgohtet, dadjá Rasmus vel.
