Sámediggeráđđi sávvá Sámi joatkkaskuvlla Guovdageainnus, oažžut ruhtadeami ođđa visttiide stádabušeahta bokte.
Sámediggeráđđi sávvá Sámi joatkkaskuvlla Guovdageainnus, oažžut ruhtadeami ođđa visttiide stádabušeahta bokte.
Sámediggeráđđi Silje Karine Muotka, geas leat oahpahusáššit okta ovddasvástádussurggiin, doarju dál Sámi joatkkaskuvlla ja boazodoalloskuvlla, mii vuordá oažžut ruđaid stáhtabušeahta bokte.
Vuordámušat ihttážii
Ráđđehus almmuha ihttin stádabušeahta 2016 ovddas. Jo skuvlaválggain gieskat almmuhii Gurutbellodaga nuoraidossodaga áirras, ahte sus lea čiegusvuohta juogadit stáhtabušeahta birra, namalassii dál boahtá juolluduvvot ruhta ođđa joatkkaskuvlii Guovdageainnus.
Dát bovttii vuordámušaid ja Muotka juogada daid:
– Sámi joatkkaskuvla ja boazodoalloskuvla Guovdageainnus lea deaŧalaš Sápmái, oahpahuslanjaid dárbbašlaš divvun dagahivččii skuvlla eanet geasuheaddjin sámegielat ohppiide ja attášii sihke bargiide ja ohppiide dálá skuvllas, dohkálaš oahpahusdiliid.
– Danne juogadan skuvlla vuordámušaid dasa ahte oahpahuslanjat vuoruhuvvojit stáhtabušeahtas, dadjá Muotka.
Loga maid: –Dál ceaggana ođđa skuvla
Muotka mielas lea erenoamáš deaŧalaš dat rolla mii Sámi joatkkaskuvllas ja boazodoalloskuvllas lea sámi servodaga ovddideamis oppalaččat.
– Go joatkkaskuvla lea okta guovtti sámi joatkkaskuvllas, de das lea deaŧalaš rolla sámi servodagas. Ovdamearkka dihtii lea skuvlla lihkostuvvan addimis iežas ohppiide buori studerenráhkkanahtti oahpu mii lea deaŧalaš dasa ahte Sámi allaskuvla oažžu doarvái ohppiid. Geasuheaddji sámi joatkkaskuvllat leat nappo áibbas deaŧalaččat dasa ahte mii nákcet oahpahit doarvái sámegieloahpaheddjiid dannego dat oahppit geat gerget sámi joatkkaskuvllain gullet Sámi Allaskuvlla studeantarekrutterema váldoulbmiljovkui, muitala Muotka.
– Dušše vuorddaša ruhtadeami
Ráđđelahtuin leat stuorra vuordámušat ráđđehusa gaskavahku bušeahttavuoruhemiide, muhto muittuhit ahte galget maiddái čađahuvvot šiehtadallamat Stuorradikkis ovdalgo stáhtabušeahtta lea čielggas.
– Munnje lea gelddolaš vuordit stáhtabušeahta, ja mun doaivvun ahte Sámi joatkkaskuvlla ja boazodoalloskuvlla viiddideapmi vuoruhuvvo. Prošekteren lea čađahuvvon, ja skuvla vuorddaša dušše ruđaid bargguide, loahpaha Silje Karine Muotka sámediggeráđis.
