Čáhcesullo fitnodat oažžu ruhtadoarjaga Sámediggeráđis doallat duodjekurssa.
Sámediggeráđđi addá 50 000 ruvnno doarjjan Akkurat – Consult AS:i, mii lea Čáhcesullos. Fitnodat áigu čađahit kurssaid náhkkegahpira goarrumis, vai kursaoasseváldit ohppet dan duoji goarrut. Náhkkegahpirat galget gorrojuvvot gieđain, nu go lea dahkkon áiggiid čađa.
– Sámediggi lea ilus go sáhttá doarjut eanet duojáriid geain lea duodji ealáhussan. Earenoamáš somá lea doarjut Nuorta-Finnmárkku duodjedoaimmaid, go dan guovllus eai leat nu gallis geain lea duodji ealáhussan, dadjá sámediggeráđđi Hans Ole Eira preassadieđáhusas.
50 000 ruvdnosaš doarjja addo doarjjaortnegis Duodji: Gelbbolašvuohta, oahpahus ja kurssat, mii lea ohcanvuđot doarjjaortnet 2023 duoji ealáhusšiehtadusa vuolde.
Eira muitala ahte doarjja addo duodjeulbmiliidda olles riikkas, ja dáhtošii eanet duodjedoaimmahagaid geavahit vejolašvuođa ohcat Sámedikkis doarjjaruđaid dán ulbmilii.