Riddu Riđđu eamiálbmot festivála lágiduvvo suoidnemánu 12.-15. beaivvi, Olmmáivákkis, Romssas. Fosen-demonstrašuvnnat ja Duohtavuođa- ja Soabahankommišuvnna raporta leat báidnán dán jagáš festivála.
Dá lea 32. háve Riddu Riđđu festivála lágiduvvo, ja dán jagi lea festivála báidnon guokte deháleamos Sámepolitihkálaš dáhpáhusain guhkes áigái; Fosen-demonstrašuvnnat ja Duohtavuođa- ja Soabadankommišuvnna raporta.
– Fosen-demonstrašuvnnat lea váikkuhan Sápmái garrasit vuosttaš beali 2023:s, ja váikkuha Sámi servvodaga guhkes áiggi ovddasguvlui. Sámi stuorámus festiválan mii háliidat leat oadjebas arena buohkaide geasa demonstrašuvnnat leat váikkuhan. Seammás lea ain vuovdnái olmmošvuoigatvuođarihkkon Fosen-sápmelaččaide. Dan čalmmustahttima mii dieđusge joatkit dassái go bissehit olmmošvuoigatvuođa rihkkuma, dadjá Riddu Riđđu festiválahoavda, Sajje Solbakk preassadieđáhusas.
Ovtta festivála seminárain leat várren nissonolbmuide mat ledje Fosen-demonstrašuvnnaid njunnošis álgojagi. Festivála nuoraidoasis lea ges siviila jeagohisvuohta sierra fáddán. Dasa lassin lea Márja Karlsen Omasvuonas ráhkadan dán jagáš dáiddačájáhusa, gii ieš oassálasttii Fosen-deomstrašuvnnain álgojagi.
Eará dehálaš fáddá lea Duohtavuođa- ja Soabahankommišuvnna raporta mii almmuhuvvui geassemánu álggus. Dán jagáš Riddu Riđđu šaddá leat okta daid vuosttaš stuorra deaivvadanbáikkiin dan rájes go raporta almmuhuvvui. «Lea go dá duohtavuohta?» panelaságastallamis ovdanbuktá kommišuvdna raportta váldogávdnosiid. Dasa lassin lágida UIT sierra seminára festiválas gos «soabadeapmi» lea váldofáddá.
