Oarje-Finnmárkku politiijaguovlu háliida buktit cealkámuša, manin sis ii lean vejolašvuohta vuoddját ikte dáhpáhuvvan áitagiid iskat Gákkajávrris.
Oarje-Finnmárkku politiijaguovlu háliida buktit cealkámuša, manin sis ii lean vejolašvuohta vuoddját ikte dáhpáhuvvan áitagiid iskat Gákkajávrris.
Lei iFinnmark neahttaáviisa, gii ovddemuš čálii ášši birra maŋŋebárgga eahkeda, go suopmelaš áhččeolmmoš ja su 15-jahkásaš gánda galgá áviissa cavgileaddji mielde leat áitojuvvon hávláriin ikte Gákkajávrris Skuvvanváris.
Ollu reakšuvnnat
Dása reagerejedje ollu olbmot earet eará sosiálamediain ja dál háliida politiija geažuhit manin sii eai vuoddján báikái.
– Mii lohkat mediain ahte leat reakšuvnnat go politiijas ii lean kapasitehta vuoddját dáhpáhusbáikái. Álbmot čájeha stuorra beroštumi politiijaid vuoruhemiid ektui ja dat leat buorre. Go leage justa máhccagiid vehkiin politiija sáhttá šaddat buoret. Muhto mii háliidat odne medias ovdanboahttit, manin mii eat sáhttán vuolgit báikái.
Buktet čilgehusa
Dán čállá Oarje-Finnmárkku politiijaguovllu operašuvnnajođiheaddji Sverre Andre Opdahl preassadieđáhusas ovdalaš diibmu 11.30.
Viidáset čallo dieđáhusas ahte diehtu hávlár áitagiin operašuvnnaguovddážii bođii ikte maŋŋel gaskabeaivvi.
– Dáhpáhus lei geavvan Gákkajávrris Skuvvanváris, muhto ii lean šat jođus go diehtu bođii politiijai. Dáhpáhus lei gieskat geavvan. Hávlár namuhuvvui, muhto ii oktage áitán hávláriin dalle go politiija lei oktavuođas telefuvnna bokte gillájeaddjin jávregáttis gos leigga oaggumin. Dát čielggai jođánit ja dáhpáhus lei nohkan.
Jápmima duktan bissehii
Ná čilge Opdahl preassadieđáhusas ja čilgege manin sis eai lean resurssat sáddet politiijaid Skuvvanvárrái iskkat ášši.
– Dan ádde várra albmot ja media odne, maŋŋel go bođii dovddusin ahte mii dutkat jápminášši Porsáŋggus. Media ii diehtán maidige jápminášši birra, go áitagat galget leat geavvan Gákkajávrris. Mis eai lean doarvái olbmot. Mii oinniimet dárbbu viežžat veahki eará doaibmabáikkiin, gos earet eará mátta-guovllus Álttás ja Guovdageainnus bohte veahkit, deattuha operašuvnnajođiheaddji.
Oidnet duođalažžan
Viidáset celko preassadieđáhusas ahte politiijat oidnet áittaášši hui duođalažžan ja leat álggahan dutkama.
– Politiija ferte árvvoštallat juohke ovttaskas dieđu mii boahtá operašuvnnaguovddážii. Dađi bahábut fertejit muhtin áššit vuoruhuvvot ovdal earáid. Dán áššis lei dáhpáhus jo nohkan, go mii oaččuimet dieđu dan birra. Ja sii geat riŋgejedje dieđihit dáhpáhusas Gákkajávrris, ožžo dieđu ahte mis ii leat vejolašvuohta boahtit, loahpaha Sverre Andre Opdahl.
