Stuorradiggi mearridii miessemánu 27. beaivvi bivdit ráđđehusa loahpahit dearvvašvuođa duođaštusa gáibádusa boarrásat biillavuoddjiin borgemánu vuosttaš beaivvi rájes. Johtolatministtar Knut Arild Hareide lea dál árvvoštallan mo dát ášši čuovvoluvvo.
Johtolatministtar Knut Arild Hareide dieđiha ii leat heivvolaš čađahit dán rievdadeami borgemánu vuosttaš beaivvi rájes, dieđihit preassadieđáhusas.
– Mii fertet sihkkarastit buohkaid oadjebasvuođa johtolagas. Lea dehálaš doaibmabidju gáibidit bákkolaš dearvvašvuođa duođaštusa boarrásut biillavuoddjiin, sihkkarastin dihtii ahte sis geain lea vuodjinlohpi maiddái devdet dearvvašvuođagáibádusaid ja nu leat dorvvolaš biilavuoddjit. Sihkastit dearvvašvuođa duođaštusgáibádusa lea stuorra rievdadeapmi ja mii dárbbašat eambbo áiggi dán rievdadeami čađahit heivvolaš vugiin, lohká johtolatministtar Knut Arild Hareide.
Stuorra hástalusat čatnot rievdadeapmái
Johtolatministtar lea árabut dieđihan Stuorradiggái dán rievdadeapmái lea čatnon stuorra hástalusat ja ahte son ii sáhte dáhkidit ahte rievdadeamit bohtet fápmui borgemánu vuosttaš beaivvi.
– Olu boarrásat biilavuoddjit, geat eai deavdde dearvvašvuođa gáibádusaid doalahit vuodjinkoartta, vaikko sin vuodjinlohpi lea nohkan. Jus dálá ortnet loahpahuvvo, de sáhttet olusat geat eai deavdde dearvvašvuođa gáibádusaid, fas oažžut vuodjinlobi. 37 proseantta biilavuoddjiin geat leat badjel 80 jagi, lea dušše oanehis áiggi vuodjinlohpi ja sin ferte čuovvolit medisiinnalaččat dávjjit. Lea dárbu albma láhkai guorahallat ja gulaskuddat vai buot bealit bohtet mielde, ja dat ii leat vejolaš ovdal borgemánu vuosttaš beaivvi, čilge Hareide.
Lihkohisvuođa riskka
Johtolatministtar Knut Arild Hareide lohká sii gehččet maid kránnjáriikkaide go árvvoštallet iešguđet doaimmaid johtolatsihkkarvuođabarggus. Lohká go sii leat buohtastahttán Norgga ja Ruoŧa johtolatdili, de orru ođđa dutkan čájeheamen ahte boarrásat biilavuoddjit Ruoŧas lea stuorát riskka bártidit johtolagas go Norggas.
– Danin lea dehálaš mo mii árvvoštallat johtolatsihkkarvuođa Norggas, čilge Hareide.
Doaktára ja oapmahaččaid rolla
Jus dearvvašvuođa duođaštusortnet heaittihuvvo, de šaddá doaktáriid pasieanttačuovvoleapmi deháleappo ja nu maid geatnegasvuohta dieđihit ja čuovvolit lágalaš mearrádusa man bokte váldet vuoddjis eret vuodjinlobi. Doaktárat ja stáhtahálddašeaddjit geat galget čuovvolit doaktáriid dieđiheami, fertejit oažžut buori diehtojuohkima ja áiggi ráhkkanit dán rievdadeapmái. Oapmahaččat fertejit maid oažžut dárbbašlaš diehtojuohkima mo sii sáhttet čuovvolit iežaset olbmuid geat eai oaččo ođastuvvot biilavuodjingoartta.
Árvvoštallet molssaevttolaš doaimmaid
Sihke iešdieđiheapmi dearvvašvuođa birra ja guhkit áiggi árvvoštallat biilavuoddjimis, galgá leat mielde go árvvoštallet loahpahit dearvvašvuođa duođaštusortnega. Dál lea sihke Stáhta geaidnodoaimmahat ja Dearvvašvuođadirektoráhta guorahallamin dán ášši, mii galgá leat gárvvis borgemánu vuosttaš beaivái.
– Dalle beasan oaidnit mo dán barggu čuovvolan, lohká Hareide.
