Davvikalohttaálbmot ii searvva NRK Sámi válgasáddaga panelii mii čájehuvvo TV:s ja web bokte.
Davvikalohttaálbmoga jođiheaddji Toril Bakken Kåven ákkastallá dan mearrádusa dainna ahte NRK Sápmi ii háliit Guovddášbellodaga mielde, geat juogadit fámu NSR:in fárrolaga.
– Šaddá veadjemeahttumin addit ovddasvástádusa ovtta bellodahkii mas lea fápmu leamaš njealje jagi, ja geat dieđusge vásihit ođđa buori válgga. Dat ii šatta duođalaš politihkalaš digaštallan. Dan dihte eat leat mii válljen searvat NRK Sámi válgadigaštallamii, lohká Davvikalohttaálbmoga jođiheaddji Toril Bakken Kåven preassadieđáhusas.
Kåven cealká ahte dat realitehtas šaddá panela mas NSR ja Bargiidbellodaga sámediggejoavkkut leat Davvikalohttaálbmoga vuostá.
– Šaddá váttisin oaidnit politihkalaš erohusa NSR:s ja Bargiidbellodagas, ja Bargiidbellodat jienasta ja lea NSR bušeahta duohken. Mun in ipmir maid NRK Sápmi rievtti mielde áigu olahit jus diehtojuohkin álbmogii lea sin mihttu. Áigot go sii dahkaluddet ahte Guovddášbellodat ii leat mielde stivreme Sámi, ja ahte dain seammás maid lea iežaset ráđđelahttu Sámediggeráđis, jearrá Kåven preassadieđáhusas.
Ii bala ahte Davvikalohttaálbmot massá saji NRK Sámi sáddagiin
– Dat lea láittas, muhto mii leat juo hárjánan vuoruhit eará mediaid. Mun lean fuobmán ahte sii leat hui beroštuvvon NSR:s, muhto midjiide ii leat dohkálaš hupmat maidege eará go politihka birra. Mis eai leat goassege ovdal leamaš nu olu miellahtut go dál, ja mii jáhkkit ahte dat manná bures ain bargat eará mediakanálaiguin.
NRK Sápmi vuhtiiváldá
Ođasredaktevra Jan Roger Østby lohká sin vuhtii váldit Davvikalohttaálbmoga mearrádusa.
– Mii vuhtii váldit ahte eai searvva válgadigaštallamii, ja mii šállošat go eai daga dan. Mii sávvat ahte sii servet eará digaštallamiidda maid mii jurddašit lágidit válgga ovdal. Min mielas lea válgagižžu olu gelddoleabbo jus sii leat mielde daid digaštallamiin, lohká Østby Ávvirii, ja joatká:
– Dat gal šaddá duođalaš politihkalaš digaštallan go Sámedikki presideantaevttohasat digaštallet. Leat dat golbma bellodagat main leat presideantaevttohasat.
NRK Sámi válgadigaštallan lea odne, gaskavahkku diibmu 18:00, ja njuolggosáddaga oaidná NRK Sámi neahttasiiddus.
