Regiovdna Norrbotten dieđiha ahte leanas lea 104 olbmos duođaštuvvon korona maŋemus jándora. Dat lea stuorimus lassáneapmi njoammumiin giđa rájes, dieđiha regiovdna preassadieđáhusas.
Eanemus korona lea gávdnon Lulejus ja Bihtámis.
Regiovnna njoammuneastadandoavttir Anders Nystedt čilge ahte olbmot eai šat čuovo eiseválddiid rávvagiid.
– 104 duođaštuvvon njoammuma leat olu, ja dilli sáhttá vearránit johtilit. Dál lea deaŧalaš bissut ruovttus jus leat dávdamearkkat, čilge son. Muhto dan eai oro olbmot dahkame dál go válljejit gávppašit ja eai ge jurddaš nuppiid birra, dadjá son preassadieđáhusas. Dál lea deaŧalaš bassat gieđaid ja doallat gaskkaid ja čuovvut rávvagiid, čilge Anders Nystedt.
Olusat eai čuovu rávvagiid ja nu njoammu dávda, čilge Nordmark Nilsson.
– Mii eat hálit seammalágan dili go giđđat lei min buohcceviesuin. Eanet njoammun váikkuha midjiide buohkaide, ja earenomážit dearvvašvuođabargiide ja sidjiide, geat vurdet eará divššu čilge Regiovdna Norrbottena regiovdnadirektevra Anna-Stina Nordmark Nilsson.
Vihtta olbmo leat dal divššus buohcceviesus koronadávdda dihte Norrbottenis. Guovttis dain leat intensiivadivššus.
