Sámediggeráđđi lea juolludan stipeandda njealji nuorra sámi valáštallái valáštallan- ja kultursuorggis.
Njeallje áŋgiris sámi nuora valáštallan-, musihkka- ja duodjesuorggis leat ožžon Sámedikki kultur- ja valáštallanstipeandda 2023. Sámediggeráđđi addá valáštallanstipeandda Sandra Maria Baltoi ja Tobias Hættai, ja kulturstipeandda fas Elise Marie Nilsen-Broderstadii ja Elina Johansen Ijäsii. Guhtege oažžu 25 000 ruvnno.
Stipeandda ulbmil lea movttiidahttit sámi nuoraid áŋgiruššat musihkain, dáidagiin, kultuvrrain ja valáštallamiin.
– Dát nuorra sámi taleanttat ovddastit máŋggalágan kultur- ja valáštallanberoštumiid ja leat čájehan erenoamáš čehppodaga iežaset surggiin. Dáid stipeanddaid bokte doarju Sámediggi nuoraid nieguid ja áigumušaid, ja doarju sin rolla kultuvrralaš ambassadevran ja movttiidahtti ovdagovvan eará nuorra sápmelaččaide, dadjá sámediggeráđđi Maja Kristine Jåma (NSR) preassadieđáhusastis.
Oanehaččat dán jagáš stipeandavuostáiváldiid birra:
– Sandra Maria Balto, 16 jahkásaš Kárášjohkalaš. Sandra Maria lea hirbmat fales vuoddji, ja lea dál buoremusaid searvvis riikaviidosaččat ja lea norggameašttir iežas ahkeluohkás. Dasa lassin leat sus máŋga medálljasaji sihke junior- ja seniorluohkás Norggameašttirgilvvuin. Balto vázzá dál skuvlla Dønski joatkkaskuvllas Bærumis, mii fállá oahppospesialiserema ja valáštallanfága, ja son lea mielde Bærumssvømmernes elitegruppas. Su ambišuvdna ja mihttomearri lea beassat Norgga vuodjanriikkajovkui ja gilvalit riikkaidgaskasaš dásis.
– Tobias Hætta, 17 jahkásaš Álttás ja Mázes eret. Tobias šattai golfataleanta maŋŋel go heittii spábbačiekčamis. Su ambišuvdna lea eallit valáštallamiin, ja 2022:s fárrii son Fetsundii skuvlla vázzit ja álggii golfasuorgái WANG toppidrett Romerikes. Tobiasis lea stuora beroštupmi valáštallamii ja hárjehallá viššalit vai ovdána. Tobias áigu atnit stipeandda earret eará dárbbašlaš hárjehallanmátkkiide ja -reaidduide.
– Elise Marie Nilsen-Broderstad, 23 jahkásaš Skániin eret. Elise Marie lea áŋgiris ja čeahpes nuorra duojár, gii deattuha márkosámiguovllu duodjeárbevieruid. Sus lea iežas fitnodat, Skaidi Duodji, ja lea earret eará ožžon Sámi Made mearkka iežas dujiide maid goarru ávdnasiin mat eai leat árbevirolaččat. Árabut čakčat searvvai son Romssa Duodji- ja Fashion Showii. Elise Marie lea mielde Stuornjárgga sámiid duojis ja áigu áŋgiruššat bargat dujiin ámmátlaččat.
– Elina Johansen Ijäs, 21 jahkásaš Guovdageainnus eret. Elina lea máŋggaid jagiid beaggán sihke artistan ja lávllačállin. Maŋŋel joatkkaskuvlla lea son čiekŋudan ja bargan musihkain, ja lea lávlon máŋgga lávddis sihke Norggas ja olgoriikkas. Elina čállá ja ovdanbuktá iežas musihka davvisámegillii. Son lea maiddái aitto searvan Lounge Sápmái Islánddas, gos son maiddái lea bargan iežas plánejuvvon álbumalmmuhemiin 2024:s. Elina álggii populáramusihka bachelorohppui čakčat 2023:s Høyskolen Kristianias, Oslos, ja háliida ain áŋgiruššat iežas artista- ja lávllačállikarrierii.
Gáldu: Sámediggi
