-Almmuhus-
-Almmuhus-
OĐĐASAT Dárbbašit eakto­dáhtolaččaid boahku­heapmái

Dárbbašit eakto­dáhtolaččaid boahku­heapmái

-

-

Sullii 26 proseantta gieldda ássiin, geat leat badjel 18 jagi boarrásat, leat ožžon boahkuid ja gielda dárbbaša eaktodáhtolaččaid dan bargui.

Deanu gielddas dárbbašit eaktodáhtolaččaid vahkkobeivviin geat galget váldit vuostá sin geat galget boahkuhuvvot, čájehit olbmuid rievttes báikái, doaimmahit bajildusdesinfiserema ja eará logistihkkabargguid.

– Dat lea dehálaš bargu vai nagodit čađahit boahkuheami, ja mii sávvat dus lea vejolašvuohta veahkehit! Don sáhtát veahkehit ovtta dahje máŋga fásta beaivvi, vaikko dušše ovtta beaivvi muhtumin! Buot veahkeha, cealká gielda sin dieđáhusas.

Gielda doaimmaha buot boahkuhemiid, ja gielda dárbbaša eaktodáhtolaččaid geat sáhttet veahkehit.

Boahkuhandilli Deanu gielddas

Dássážii leat 620 ássi ožžon vuosttaš boahkuheami. Dát lea sullii 26 proseantta sis geat ožžot boahkuhanfálaldaga (ássit badjel 18 jagi) álgovuorus. Gielda lea geargan boahkuheame buhcciidruovttu ássiid ja ássiid geat lea badjel 85 jagi boarrásat. 95 proseantta ahkejoavkkus 75-84 leat ožžon vuosttaš dosa.

15. ja 16. vahkus boahkuhuvvo ahkejoavku 65-74 ja seammás ássit ahkejoavkkus 18-64 jagi geain lea dávda/dilli mas lea alla riska duođalaš čuozahusaide. Sáhttá lohkat eambbo dan birra guđet dávddat gullet dan jovkui dás: Vuoruhanvuorru boahkuide.

Elektrovnnalaš vuogádaga boahkuheapmái

Leat go dus hástalusat registreremiin, de sáhttá muhtun eará, omd. bearašlahttu dahje ránná, maiddái veahkehit du registreremiin neahttasiiddus. sáhtát maiddái riŋget vai oaččut veahki registreremii boahkuhanmielbargis Lillianas, tlf. 455 177 04 disdagaid dii 9-12. Buohkat geat registrerejit iežaset boahkuhanvurrui, ožžot SMS mas fállojuvvo diibmu sidjiide boahkuheapmái.

– Dál leat veaháš eanet boahkut, muhto ain váldá áiggi ovdal go buohkat, geat leat registreren iežaset boahkuhanvurrui, ožžot boahkuhanfálaldaga. 15. vahkus leat mis sullii 110 Pfizer boahku ja 16. vahkus sullii 100 Pfizer boahku. Danin go váruhuvvojit duođalaš liigeváikkuhusat, de leat buot boahkuheamit AstraZeneca boahkuin gaskaboddosaččat bissehuvvon, cealká gielda dieđáhusas.

-Almmuhus-