-Almmuhus-
OĐĐASATDárbbašit 4,5 miljovnna prošektii

Dárbbašit 4,5 miljovnna prošektii

-

-

Arctic Lavvo AS álggahuvvui 2016:s ja lea šaddan njunuš tealtá- ja lávvobuvttadeaddjin Norggas. Dál sii háliidit čoaggit eanet kapitála. 

Fitnodagas lea fabrihkka Guovdageainnus gos sii leat geavahan olu ruđa hutkat ođđa gálvvuid. Dál sii bovdejit olbmuid mielde mieleaiggádin, vai sáhttet ovddidit fitnodaga. Sis lea hállu čoaggit 4,5 miljovnna ruvnno, vai sáhttet doaimmahit prošeavttaid ja plánaid maid leat bidjan boahttevaš jagiide. 

Ruhtadeaddji ja ambassadevra

Arctic Lavvo AS beaivválaš jođiheaddji Anders Bongo-Wiik mielas lea oba gelddolaš vuohki hukset kapitála. Sii leat válljen máŋga smávva ruhtadeaddji dan sadjái go moadde stuorra fitnodaga mielde investeremiidda. 

– Juohke ruhtadeaddji dahje mieleaiggát šaddá dego ambassadevra fitnodaga ovddas go buriid hállet, ja dan láhkai vuovdalit fitnodaga, dadjá Bongo-Wiik. 

Moadde vahkku lea juo leamaš vejolašvuohta ovdagihtii dieđihit iežaset ruhtadeaddjin, ja ná guhkás sis leat juo badjelaš 60 ruhtadeaddji. Gaskavahku geassemánu 15. beaivvi rahppo almmolaš dieđiheapmi. 

– Mis lea 4,5 miljovnna biddjon mearrin, nu ahte go dahje jus dan nagodat olahit, de mii eat šat váldde eambbo ruhtadeaddjiid, muitala son. 

OVDAMUNNI: Ruhtadeaddjit ožžot haddevuoládusa Arctic Lavvo gálvvuin. Govva: Arctic Lavvo AS.
OVDAMUNNI: Ruhtadeaddjit ožžot haddevuoládusa Arctic Lavvo gálvvuin. Govva: Arctic Lavvo AS.

Ruhtadeaddji ovdamunit 

Ruhtadeaddjit ožžot oalle buori haddevuoládusa Arctic Lavvo gálvvuin. Dál lea nu ahte juohke ruhtadeaddji oažžu seamma ovdamuni, leaš dal investeren 1650 ruvnnu ovddas, mii lea dat gáibádus, vai 5000 ruvnnu ovddas. 

– Mii háliidit dieđus hukset gánnáhahtti fitnodaga. Leat maid háleštan dan birra ahte jus mii boahtteáiggis mearridit vuovdit fitnodaga, de lea fitnodagas olu stuorát árvu go dál lea, ja dat dieđus maid šaddá ruhtadeddjiide vuoitun, muitala Bongo-Wiik. 

Son čevllohallá dainna go  lea Arctic Lavvo mieleaiggát ja muitala ahte lea hui somá leat mielde huksemin fitnodaga mii lea earálágan go eará fitnodagat Norggas.

– Norggas eai leat galle tealtabuvttadeaddji, ja čájehuvvo ge ahte lea vejolaš doalahit industriija dáppe. Lean čeavlái go ráhkadat báikkálaš bargosajiid ja sáhttit heivehit gálvvuid min oastiide, muitala son. 

Heivehit iežaset márkaniidda

Arctic Lavvo strategiija mannan jagiid lea leamaš ráhkadit reagaid main lea tealtá, muhto sii leat oaidnán ahte ii leat leamaš dát dat buoremus áigemuddu, go leat gitta mátkeealáhusas ja pandemiija lea dieđus dahkan dan váttisvuohtan. 

– Mis lea ovdamunni geahčestit dál eará márkaniidda ja buvttadit gálvvuid maid doppe dárbbašit. Nu mo dál lea dilálašvuohta máilmmis, de lea olu mii geavvá suodjalussuorggis, sihke Norggas ja olgoriikkas, maid mii sáhttit fokuseret, dadjá Bongo-Wiik. 

Háliidit ráhkadit bargosajiid

Arctic Lavvus leat dál 16 ollesáigge bargi, muhto mihtuid mielde mat sis leat boahttevaš viđa jahkái, de dárbbašit beali eanet bargiid. Dainna stuorrunvejolašvuođain ja mihtuin sii háliidit ráhkadit eanet báikkálaš bargosajiid. 

BÁIKKÁLAŠ BARGOSAJIT: Arctic Lavvo háliida ráhkadit eanet báikkálaš bargosajiid. Govva: Arctic Lavvo AS.
BÁIKKÁLAŠ BARGOSAJIT: Arctic Lavvo háliida ráhkadit eanet báikkálaš bargosajiid. Govva: Arctic Lavvo AS.

– Jus galgat buvttadit eanet, de mii dárbbašat eanet bargiid. Mii maid geahččat teknologiija ja mašiinnaid guvlui vai dien láhkai nagodat gilvalit eará fitnodagaiguin, muhto mii bargat giehtadujiin ja danin fertejit leat olbmot eai ge mašiinnat mat gorrot, loahpaha Arctic Lavvo beaivválaš jođiheaddji, Anders Bongo-Wiik. 

-Almmuhus-