Dássážii leat nagodan registreret gaskkal 111-116 gumppe Norggas. Logi dáin leat báhččon. Gumpelohku registreren ii leat vel geargan.
Dálvvi gumperegistreren lea álggahuvvon ja dássážii leat nagodan registreret gaskkal 111-116 gumppe. 44-45 gumppe johtet aivve Norggas. 54-57 gumppe johtet Norggas ja Ruoŧas ja 13-14 gumppe eai dieđe sihkkaris gullevašvuođa.
Logut eai leat vel obbalaččat go lohkan bistá velá dálvvi miehtá ja miessemánu 15. beaivvi sáhttet loahpalaš loguid ovdanbuktit. Lea Innlandet Allaskuvla gii lea čállán gumpelogu raportta Rovdata ovddas.
10 jápmán gumppe
10 daid registrerejuvvon gumppiin leat báhččon liseansabivddu oktavuođas. Gávcci gumppiin leat báhččon Norggas. 2 Ruoŧas.
– Go daid jápmán gumppiid geassá eret, de leat vel báhcán 101-106 gumppe mat leat registrerejuvvon. Dat mearkkaša ahte 36-37 gumppe leat čađagaskka Norggas. Eanaš gumppet leat Innlandet ja Viken gumpeguovlluin, earet go guokte gumppe mat leat registrerejuvvon Báhčaveajis nuorta Finnmárkkus ja Trøndelága riikkarájá luhtte, lohká Rovdata jođiheaddji Jonas Kindberg.
Dárbbašit veahki
Stáhta luonddubearráigeahčči (SNO) hástala olbmuid dieđihit jus vuhttet gumppiid.
– Bivdit álbmoga juohkelágan vuohttimiid dieđihit SNO:i ja áinnas jus dihtet čivgamiid birra, lohká SNO Jan Wilberg.
Stuorradiggi lea mearridan nationála nállemihttu. Oktiibuot galget 4-6 gumpečivgama jahkásaččat, ja unnimus golbma dáin galget leat ollesáigge Norgga gumpečivgama.
