Olu norgalaččat dáidet behtohallan dál go Norga vuosttaš geardde viđa jahkái ii olahan Eurovision finálii. Dát guovttos dattege eaba gal láitte.
Daniel Kolsrud ja Eirik Rosenkrants leaba Kristiansundas mátkkoštan Stockholmii čuovvut Agnete Eurovision-gilvvuin.
Dál eaba beasa gal unjárnieidda gullat lávvardaga finálas, muhto soai liikká rámideaba Agnete.
– Son dagai máilmme buori barggu, ii leat su sivva go ii beassan viidáseappot, lohkaba soai.
– Menddo erenoamáš lávlla
Albmáguovttos jáhkkiba Agnete lávlaga leamašan menddo erenoamážin Eurohpá guldaleddjiide.
– Dat soittii menddo ođas ja ođđamállet lávlla, iige Eurohpá soaitán áddet lávlaga. Dat lea dakkár man ferte moddii guldalit ovdal go dan ádde, muhto lea hui buorre lávlla, oaivvildeaba soai.
Rámideaba
– Agnetes lei áibbas ráinnas jietna, son gal ovdanbuvttii albmaládje, lohkaba soai.
Norgalaččaguovttos eaba gal heahpanatta vaikke riikka ii beassan ge finálii.
– Moai gal ledne rápmásat go ledne norgalaččat odne.
Vuosttaš geardde viđa jahkái
Lea vuosttaš geardde viđa jahkái ahte Norga ii leat beassan Eurovision Song Contest finálii. Nubbi davviriika mii odne gahčai eret gilvvus, lei Danmárku.
