Bargiidbellodat ovttas earáiguin, leat gomihan NSR sámediggeráđi. Bearjadaga vállje dievasčoahkkin ođđa presideanta ja ráđi.
Bargiidbellodat ovttas earáiguin, leat gomihan NSR sámediggeráđi. Bearjadaga vállje dievasčoahkkin ođđa presideanta ja ráđi.
Maŋŋebárgga beakkehii ahte Bargiidbellodat (Bb) duorastaga boahtá ovddidit eahpeluohttámuša Norgga Sámiid Riikasearvái, guhte lea stivren unnitlogus dán áigodagas.
NRK Sápmi muitalii ovddemuš dan birra.
Ávvira dieđuid mielde lea dá ođđa Sámediggeráđđi; presideanta Vibeke Larsen (Bb) ja muđui leat ráđđelahtut Ronny Wilhelmsen (Bb), Mariann Magga (Bb), Lars Filip Paulsen (Olgešbellodat) ja Inger Elise Eriksen (Árja).
Bušeahtta riidogaskaoapmin
Dál lea sámedikki dievasčoahkkin gieđahallan 2017 bušeahta, ášši mii lea ge dagahan váttisvuođa NSR:i, ja čoahkkinlanjas ledje garra digaštallamat.
Nu go Ávvir lea ovdal čállán de lea Bargiidbellodagas šiehtaduvvon bušeahttaovttasbargu dáid bellodagain Árjan, Åarjel-Saemiej Gielh bellodagain, Olgešbellodagain ja Sámit Lulde bellodagain.
Oktiibuot leat nagodan čohkket 19 áirasa, muhto váilo ovtta áirasis dahje bellodagas doarjja olahit eanetlogu.
Duogáš áššis lea ahte bellodagat leat duhtameahttumat ráđi bušeahttaevttohussii ja NSR bargovuohkái ja čuoččuhuvvo ahte ii leamašan gulahallan eará joavkkuiguin.
Erenomážit guovttegielat vuoruheapmi lea suhttadan eará bellodagaid.
Bargiidbellodat ovdanbuktá sierra bušeahttaevttohusa, mii lea ráhkaduvvon ráđi evttohusa vuođul, muhto leat lasihan dan maid oidnet váilevažžan.
Ii hálit kommenteret
Bargiidbellodaga parlamentáralaš jođiheaddji Vibeke Larsen duođašta bušeahtta ášši lea dagahan hástalusaid ja ahte sii leat ovddideamen otne sierra bušeahttamolssaeavttu dievasčoahkkimii .
– Mun in hálit olus kommenteret ášši ovdal go gieđahallo dievasčoahkkimis. Mun lean gearggus váldit ovddasvástádusa, lohká Larsen.
Vibeke Larsen maid ii hálit duođaštit dahje biehttalit lea go sis ráđđi nammaduvvon.
Gearggus stivret
Árjja parlamentáralaš jođiheaddji Laila Susanne Vars lea gearggus ovddidit eahpeluohttámuša ja lohká Árja maid lea gearggus váldit ovddasvástádusa jus Sámedikki presideanta Aili Keskitalo mearrida guođđit posišuvnna.
Laila Susanne Vars duođašta ahte eanetlohku lea evttohan ráđđelahttui geat leat gergosat stivregoahtit, jus šaddá dilli nu ahte NSR guođđá stivrejumi.
– In hálit kommenteret dađi eambbo ráđi birra gažaldagaid. Mis galget ain leat joavkočoahkkimat, logai Vars maŋŋebárgga.
Doarjja Bb eanetlohkui
Ovddádusbellodat lea ovddidan iežas bušeahta ja joavkojođiheaddji Aud Mathisen lohká sin doarjut Bb eanetlogu bušeahttaevttohusa.
– Mii áigut doarjut Bb bušeahttaevttohusa jus min iežamet bušeahtta vuoittáhallá, lohká Mathisen guhte ieš ii leat otne jienasteamen.
Eahpesihkkaris dilli čuožžilan
Nordkalottfolket parlamentáralaš jođiheaddji Torill Bakken Kåven mielas lea erenomáš ja eahpesihkkaris dilli čuožžilan Sámedikkis ja lohká dál vuos áigut geavahit áiggi geahčadit Bb bušeahttaevttohusa ovdal go loahpalaččat mearrida gean doarju.
– Oalle eahpesihkkaris dilli lea čuožžilan, šaddá gelddolaš oaidnit bohtosa jienasteamis, lohká Kåven.
Háliidan rievdadusaid guhkit áigge
Torill Bakken Kåven lohká iežaset háliidan molsut Sámediggeráđi guhkit áigge, muhto dál lohká fertet árvvoštallat dilálašvuođa.
– Mii leat sávvan molsašumi, muhto dál eat leat vel oaidnán makkárge Bb bušeahttaevttohusa, nu in sáhte ovdagihtii mearridit doarjut go sin vai ii. Seammás lea válgajahki, ferte maid dan árvvoštallat, logai Kåven disdaga Ávvirii.
