Riddu Riđđu lea almmuhan boahtte geasi vuosttaš artistta, ja festivála bealis illudit go Mari Boine fas čuojaha sin lávddis.
Dušše guovtti mánu maŋŋel go Eurohpá stuorámus álgoálbmotfestivála, Riddu Riđđu, lágiduvvui Olmmáivákkis, Gáivuona suohkanis, de almmuhuvvo jo boahtte geasi vuosttaš artista.
Riddu Riđđu čállá preassadieđáhusas ahte Mari Boine čuojaha festiválas 2024:s.
– Mari Boine lea ikona ja pioneara Sámis, iige leat áibbas amas su gohčodit Sámi Dronnegin. Go Mari lávke lávdái, de nagoda olles publika fátmmastit erenoamáš vugiin. Ain dán beaivái de jurddašalan su maŋemuš Riddu-konseartta birra. Olmmoš ferte su vásihit, lohká festiválahoavda Sajje Solbakk.
Dego ruovttus
Go Mari Boine álggii artistan 1980-logu álggus, de lei su suhttu vuolggaheaddjin. Dan rájes son lea movttiidahttán álgoálbmotartisttaid miehtá máilmmi vuostálastit badjelgeahččama, koloniserema ja vearrivuođa.
Mari Boine musihkka lea garrasit čadnojuvvon sámi kulturárbái, seammás go viežžá inspirašuvnna iešguđetlágan kultuvrrain ja šáŋŋeriin. Árbevirolaš ja ođđaáigásaš čatnasit sihke jazzii, álbmotmusihkkii, rockii ja popii. Su buvttadeamit leat dovdosat miehtá máilmmi ja son lea ožžon ollu bálkkašumiid barggus ovddas. 2018:s son oaččui Spellemann gudnebálkkašumi.
Mari Boine čuojahii Gáivuonas vuosttaš gearddi 1989:s ja lea dan rájes máŋgii čuojahan Riddu Riđus. Mari Boine lea ovdal dadjan ahte dovdá iežas ruovttus go boahtá Gáivutnii.
Riddu Riđđu dieđiha ahte leat rahpan bileahttavuovdima ja ahte leat njeaidán hatti vuosttaš 100 festiválapássas.
