Garra jearu ja márkangilvvu dihte lea bohcco- ja ealggačoarvvis buoret haddi go bierggus.
Alimus haddi čorvviin lea 160 kr gilos, haddi mii lea sakka lassánan moatti jagis. Per-Erik Niva oaivvilda táhpen hatti ektui.
– Eanaš čoarvvit mannet Ásiai. Mii geat dárbbašit min buktagiid fertet čuovvut haddegoargŋuma vai gávdnat buriid čorvviid, dadjá Per-Erik Niva SVT Sápmái.
Maŋemus viđa jagis lea čoarvehaddi lassánan badjel beliin ja lea dál 150-160 ruvnno gilos.
Man ilus leat don go čoarvvit mannet Kiinnái?
– In leat veháge ilus dan dihte. Lea heittot go čorvviid sáddejit Kiinnái ja doppe šaddet pulvvarin. Sáhttá sidjiide lohkat ahte sii sáhttet baicce gáskit gaccaid, go das lea seamma ollu kálka. Lea váivi go lea nu, muhto lea márkan mii stivre hattiid, dadjá Per-Erik Niva SVT Sápmái.
Duojáriidda gártan divraset
Leat alla hattit mat dahket váttisin duojáriidda ja fitnodagaide nu go Gárasavvona niibberávdái mii dárbbaša čoarvvi duodjeávnnasin.
– Ii livčče ášši jus vuovddáše dušše heajos čorvviid, muhto dál vuvdet buot ja dat mii váivvida lea go čorvviid millejit pulvvarin. Dat lea billisteapmi buori ávdnasis, dadjá Per-Erik Niva SVT Sápmái.
Vuovdá Kiinnái
Per-Gustav Labba Sohpparis eret oastá čorvviid maid vuovdá fas Kiinnái. Son lohká ahte lea stuora háhku čorvviide dál go čoarvevuovdit Ruoššas leat bajidan hattiid. Gávppašeaddjit leat oastigoahtán Skandinavia márkanis čorvviid. Kiinná ruhtadilli lea nanus ja dat lea čuohcan hattiide.
– Ieš in jáhke diesa, muhto kiinnálaččat gal jáhkket. Leat kultuvrralaš oainnut čorvviide ja dat dagaha stuorát hágu Kiinnás, muitala Per-Gustav Labba SVT Sápmái.
