-Almmuhus-
SMÁVVAOĐĐASATKiinná ja Narjan-Mar nannejit ovttas­barggu

Kiinná ja Narjan-Mar nannejit ovttas­barggu

-

-

– Kiinná lea min strategalaš ovttasbargoguoibmi, dajai Nenetsa regiovnna sátnejođiheaddji. 

Mannan vahkus leat Kiinná ovddasteaddjit galledan árktalaš guovllu iskan dihtii iežaset vejolašvuođaid oassálastit prošeavttaide árktalaš regiovnnas. 

Nenetsa regiovnnas ásset nenetsalaččat, eamiálbmotjoavku masa boazodoallu lea seammá dehálaš ealáhus go sámiide. 

Narjan-Mar lea regiovnna oaivegávpot, gos regiovnna bajimusdási politihkkárat leat vuostáiváldán Kiinná republihka gávpealbmáid. 

– Deaivvadeapmi lea duođaštus dasa ahte Kiinná lea strategalaš ja dehálaš ovttasbargoguoibmi, lohká regiovnna sátnejođiheaddji. 

Nu go bođii ovdan čoahkkimis gos ságastallojuvvui vejolaš ovttasbarggus industriijasuorggis, de lea Kiinná gearggus aktiivvalaččat searvat prošeavttaide mat leat jo jođus árktalaš regiovnnas. 

– Hui mávssolaš ahte dii addibehtet vejolašvuođa midjiide. Mii leat gergosat ovttasbargat, plánema rájes gitta huksemii, muitalit Kiinná joavkku ovddasteaddjit. 

Dan dieđiha The Barents Observer.  Čoahkkin lea leamaš njukčamánu 21. beaivvi 2023. 

Nenetsa regiovnnas lea olu oljo ja eará «riggodagaid» eatnama vuolde. Regiovnnas leat earret eará Lukoil oljofitnodat ja nu maiddái Gasprom.  

-Almmuhus-