Suoidnemánu guovtti vuosttaš vahkkus heavvanedje Norggas čieža olbmo. Dat lea seamma ollu go seamma áigodagas diibmá.
Guđas sis geat heavvanedje ledje badjel 45 jagi. Ja ain leat dievdoolbmot eanetlogus heavvananstatistihkas.
– Gádjunsearvvis lea višuvdna ahte «Ii oktage galgga heavvanit», ja danne ii leat ge nu somá gávnnahit ahte diimmá alla geasselogut ain jotket dán jagi. Suoidnemánu 1. beaivvi rádjai ledje 15 unnit olbmo heavvanan dán jagi go diibmá. Muhto de leat dat suoidnemánu logut mat leat seamma ilgadat go diibmá, čállá Gádjunsearvvi gulahallanhoavda Frode Pedersen preassadieđáhusas.
45 olbmo heavvanan
Dán rádjai dán jagi leat oktiibuot 45 olbmo heavvanan. Dat lea 15 unnit go diibmá, seamma áigodaga. Ággan dása sáhttá atnit dan čoaska giđasgeasi ja álgogeasi mii dán jagi lei, go buohtastahttá diimmá temperatuvrraiguin, oaivvilda Gádjunsearvi.
– Go buohtastahttá loguid miessemánu 1. beaivvis suoidnemánu 16. beaivvi rádjai, de leat dán jagi heavvanan 24 olbmo diimmá 34 ektui, čállá Pedersen
67 doaibmabiju
Árat dán vahkkus attii mearrajohtindirektoráhtta doaibmaplána ealáhusministarii mas ledje 67 doaibmabiju mat galget eastadit heavvaneami ja lihkohisvuođaid astoáiggi fanasgeavaheamis. Ealáhusministtar Torbjørn Røe Isaksen lei čielggas go dajai ahte son doarju nullavišuvnna heavvaneami ja mearralihkohisvuođaid ektui. Dán son oaivvildii sáhttit olahit jus ráhkada mihtuid boahttevaš jagiide.
– Mii joatkit ain miellaguoddobargguin eiseválddiiguin ja eará organisašuvnnaiguin. Dán jagi mii ávžžuhit olbmuid loktet čalmmiideaset ja várjalit nubbi nuppi. Ja mii maid ávžžuhit olbmuid jurddašit iežaset sihkarvuođa birra go leat vuojadeamen ja suohtastallamen mearragáttis, loahpaha Pedersen preassadieđáhusa.
