-Almmuhus-
-Almmuhus-
-Almmuhus-
SMÁVVAOĐĐASATČieža olbmo heavva­nedje cuoŋo­mánus

Čieža olbmo heavva­nedje cuoŋo­mánus

-

-

Norggas heavvanedje čieža olbmo cuoŋománus. Dássážii leat dán jagi heavvanan 21 olbmo Norggas, čájeha gádjunsearvvi Redningsselskapet heavvananstatistihkka. 

Diibmá 2022:s dáid muttuid ledje Norggas heavvanan 20 olbmo. Norggas leat cuoŋománu 2023:s heavvanan vihtta albmá ja guokte nissona go gahčče gáttis dahje kájas. 

Lei muhtin guđátlotjahkásaš almmái gii gávdnui heavvanan mearas káija láhka Sandefjordas. Nubbi almmái gávdnui heavvanan go lei gahččan Akersjohkii Oslos. Guokte albmá, goalmmátlotjahkásaččat, gávdnuiga heavvanan Lindesnes gielddas ja Mandalas. 44-jahkásaš almmái gávdnui heavvanan go lei gahččan merrii Stavangeris. Njealjátlotjahkásaš nisu heavvanii go manai suddái Sarpsborgas. Ovccátlotjahkásaš nisu heavvanii go vujii biillain badjel geainnu Steinkjerjohkii. 

– Vaikko áibmotemperatuvra lieggana miessemánus, de lea ain čázis dálvetemperatuvra, vuollel logi gráda, miehtá Norgga, lohká Redningselskapet heavvananeastadeaddji fágahoavda Tanja Krangnes.

Son lohká jus olmmoš gahččá ná galbmačáhcái, de healkkeha rumaš ja álgá menddo jođánit vuoigŋat, ballá issorasat ja lea bahá njiellagoahtit čázi. Jus vahágis gahččá čáhcái, de galgá gávvut jorggihit dassážii go nagoda vuoigŋat lunddolaččat, lebbet julggiid ja gieđaid nástehápmái. Lihkat gulul julggiid ja gieđaid vai govddut. Huikke veahki ja geahččal vuodjat gáddái.  

-Almmuhus-