Davvi-Norgga geainnuin eai lean jápminlihkohisvuođat čakčamánus
Davvi-Norgga geainnuin eai lean jápminlihkohisvuođat čakčamánus
Mannan geassi lei vearrámus lihkohisvuohtageassi Davvi-Norggas viđa jahkái, muhto čakčamánnu gal šattai buorre mánnun.
Gaskaboddosaš logut čájehit ahte ii oktage duššan johtolatlihkohisvuođain mannan mánus.
Dat ii leat dáhpáhuvvan cuoŋománu rájes.
2016:s leat dán rádjai duššan 16 olbmo johtolatlihkohisvuođain.
– Dat leat eambbosat go diibmá dáid muttuid, ja golbma eambbo go 2014:s, čállá Stáhta geaidnodoaimmahat preassadieđáhusastis.
Gaskamearálaččat leat maŋimuš vihtta jagi duššan gaskkal 18 ja 19 olbmo johtolatlihkohisvuođain Davvi-Norggas, jagi álgo ovcci mánus.