Sámi Našunálateáhter gálleda Kalaallit Nunaata Našunálateáhtera. Doppe čájehit Konseartačájálmasas Juoiggas!
Konseartačájálmasas Juoiggas! maid čájehit Kalaallit Nunaatas lei álgočájálmas 2019:s, Riksscenenis Oslos. Dan maŋŋel lea Sámi Našunálateáhter mátkkoštan viidát čájálmasain.
– Sihke Norgga, Ruoŧa ja Suoma bealde vuostáiváldui bures sihke gehččiin ja árvvoštalliin. Dál illudit čájehit dán juoigankonseartačájálmasa Kalaallit Nunaatas, čállá teáhter preassadieđáhusas.
Juoiggas-konseartačájálmasain bovde Sámi Našunálateáhter Beaivváš gehččiid mielde musihkalaš mátkái:
– Luohti gullá Davvi-Eurohpá boarráseamos šuokŋamálliide. Dat lea seilon buolvvas bulvii máŋggaid duháhiid jagiid, ja luohti lea Beaivvi nieidda myhtalaš skeaŋkan sámiide gottiid dápmanreaidun. Musihkalaš gullevašvuođamearkan. Dáinna konseartačájálmasain áigu Sámi Našunálateáhter Beaivváš guorrat luohtehistorjjá ja doaimma áiggiid čađa. Beassat gullat go muhtin juoiggasta muhtima. Mot luohtedajahallan bekkii 1600-loguid loahpageahčen Eurohpás ja movttiidahtii diktačálliid doppe, mii juoigat luđiid áiggiid čađa juohke sajis Sámis – bivdomálliid 6000 jagi dás ovdal gitta otnážii, čilge teáhter preassadieđáhusas.
Konseartačájálmas čájehuvvo Nuukas čakčamánu 20. beaivvi.
