Juiget luđiid áiggiid čađa juohke sajis Sámis – bivdomálliid 6000 jagi dás ovdal gitta otnážii.
Sámi Našunálateáhter Beaivváš lea gearggus ođđa bihtáin, Juoiggas konseartačájálmasain, mas álgočájálmas lea oaivegávpogis, Oslos loahpas dán vahkku. Daid beivviid hárjehallet vel maŋemus gerddiid ovdal čavgejit mátkái.
Go sánit eai leat šat, de ferte juoiggastit
Luohti gullá Davvi-Eurohpá boarráseamos šuokŋamálliide. Dat lea seilon buolvvas bulvii máŋggaid duháhiid jagiid, ja luohti lea Beaivvi nieidda myhtalaš skeaŋkan sámiide gottiid dápmanreaidun. Musihkalaš gullevašvuođamearkan.
Dáinna konseartačájálmasain áigu Sámi Našunálateáhter Beaivváš guorrat luohtehistorjjá ja doaimma áiggiid čađa. Geahččit besset gullát go muhtin juoiggasta muhtima. Mo luohtedajahallan bekkii 1600 loguid loahpageahčen Eurohpás ja movttiidahtii diktačálliid doppe. Sii juiget luđiid áiggiid čađa juohke sajis Sámis – bivdomálliid 6000 jagi dás ovdal gitta otnážii.
Musihkalaš mátki
JUOIGGAS konseartačájálmasain bovde Sámi Našunálateáhter Beaivváš gehččiid mielde musihkalaš mátkái miehtá Sámi mas álgočájálmas lea bearjadaga, ođđajagimánu 18. beaivvi Riksscenenis Oslos.
Lávdegiella lea davvisámegiella, tekstejuvvo dárogillii.