Norgga čázádat- ja energiijadirektevra Kjetil Lund ávžžuha gielddaid miehtá Norgga fuolahit ahte ádjagat leat rahpasat vai sáhttet dustet dulvečázi jus garrasit arvá guovllus.
NVE (Norgga čázádat- ja energiijadirektoráhtta) lea sádden preassadieđáhusa mas NVE čázádat- ja energiijadirektevra Kjetil Lund muittuha ahte ádjagat sáhttet vahágahttit guovllu jus daidda ii čáhkket saji.
– Ája mii golgá sivvadit ja čábbát muhtin leagis ii oro váralaš. Muhto ále dájut iežas. Diet smávva ája sáhttá garra arvin šaddat nu gievra ahte sirdá sihke dáluid ja doalvu eret geainnuid. Danin ávžžuhan gielddaid: Čáhkkehehket saji ádjagii, deattuha NVE čázádaga- ja energiijadirektevra Kjetil Lund.
Dulvečáhci
Borgemánu 13. beaivvi arvvii nu garrasit Brumunddal báikkis ahte buot ádjagat dulve.
Čáhci čuovui ádjaga gitta čoahkkebáikái gos ledje čuovuhan ádjagiid bohcciid sisa, čáhkken dihtii saji viesuide.
Ii ádjánan guhká ovdal go dulvečázi mielde bohte geađggit, ruohttasat, rissit ja buot eará ruskkat mat buđđo bohccenjálmmiid.
Dulvečáhci ii bisánan diesa, muhto leavai eará sajiide; čađa šáttogárddiid, luoddaearuid ja viesuid, čállá NVE.
Miehtá Norgga čihkkon ádjagat
Čihkkon ádjagat eai leat dušše Brumunddal báikkis Ringsaker gielddas.
Miehtá Norgga leat ádjagat máŋgalogi jagiid biddjon bohcciid sisa golgat, go viessohuksen ja industriija lea vuoruhuvvan čázádagaid ektui.
Hástalusat
Leat guovttelágan hástalusat go čuovuha ádjagiid bohcciid sisa.
Vuosttažettiin fertejit leat bohccit dan mađe galjit ahte njillet maiddái dulvečázi.
Dál go dálkkádat rievdá, de lea váttis einnostit man galjit bohccit berrejit leat.
Nubbi váttisvuohta lea ahte lea dábálaš ahte bajábeale bohccenjálmmi, de lea bahá ahte dat dahppo go dulvi buktá geđggiid ja ruskkaid.
Danin ferte dávjá fuolahit ádjagiid bohccenjálmmiid ja bearráigeahččat daid jus arvigoahtá garrasit.
Dát gáibida ahte gielddain lea geavatlaš gearggusvuohta.
– Jáhkimis lassánit garra, báikkálaš arveoavttit nu mo Brumunddalas boahttevaš jagiid. Danin leat mii sorjavačča ahte mis leat ádjagat mat dolvot eret dulvečázi dorvolaččat. Danin berre fuolahit ahte ádjagat eai buđđás, čállá NVE
Vuoitun servodahkii
Dehálaš dálkkádat heivehandoaibma lea rahpat ádjagiid. Dalle oažžu ája saji dulvat ja čázádaga iežas dustenfámut besset doaibmat.
Danin lea maid dehálaš ahte ođđa viesut eai huksejuvvo menddo láhka ádjagiid ja jogaid amas eai rahkat alccemet ođđa dulveváttisvuođaid.
Dás lea gielddas dehálaš ovddasvástádus.
Rabas ádjagiid vuoitu lea sihke buoret sihkkarvuohta go dulvá, muhto maid čáppa ja ruonas guovlu báikegoddái.
