Lea arván ollu Guovdageainnus mannan geasi ja Meterologalaš Instituhtas dieđihit arveolahusa Finnmárkku duoddaris. Lea 68 jagi áigi go maŋemus arvvii badjel 300 mm Guovdageainnus.
Lea arván ollu Guovdageainnus mannan geasi ja Meterologalaš Instituhtas dieđihit arveolahusa Finnmárkku duoddaris. Lea 68 jagi áigi go maŋemus arvvii badjel 300 mm Guovdageainnus.
Eai leat galle fiertobeaivvi leamašan Finnmárkkus mannan geasi ja eana ii leat ollen albma ládje goikat ovdal go fas bidjá arvvi. Arvi lea šnjoarran beali eanet go dat mii lea gaskamearálaččat dábálaš, ja Guovdageaineatnu lea doalahan dulvvi miehtá geasi, vaikko ii leat dulveolahus dán jagi.
Ollu arvvit leamaš
– Ollu báikkiin Finnmárkkus lea arván olu mannan geasi. Erenoamážit Finnmárkku duoddaris ja Nuorta-Finnmárkkus lea mihtiduvvon eanet arvi go dábálaččat geassemánuid. Rittus oarjin ja davvin lea ges arván unnit go dábálaččat, erenoamážit borgemánus, muitala Meterologalaš Instituhta meterologakonsuleanta Håvard Larsen Ávvirii.
Olahus Guovdageainnus ja Sihčajávrris
– Lulimus oasis Finnmárkkus eat leat goassege ovdal mihtidan dán mađe arvvi ovtta geasis. Sihke mihtidanstašuvnnat Guovdageainnu ja Sihčajávrri mihtidanstašuvnnat leat mihtidan ođđa olahusa. Badjel 350 mm arvi lea dušše geassemánuin arván, mii lea badjel beali eanet go lea dábálaš njuoskkadat geasis. Geassemánuid njuoskkadat lea seamma ollu dál go mii dábálaččat boahtá olles jagis, muitala Larsen ja lasiha ahte geassemánut leat njuoskkaseamos mánut jagis.
Eará báikkiin Finnmárkkus lea maid arván oalle ollu, muhto doppe eai leat ođđa olahusat. Guovdageainnus mihtiduvvui 362,6 mm arvi geassemánu, suoidnemánu ja borgemánu. Seamma golmma mánus mihtiduvvui Sihččajávrris 376,7 mm njuoskkadat.
Dálki lagamus áiggi
Meterologa muitala goikáset dálkki lagamus áiggi:
– Lávvordaga šaddá oalle fiinna dálki, muhto sáhttá leat veahá čoaskkis. Sotnabeaivvi šaddá fas ollu arvi. Boahtte vahkku sáhttá arvvestit veháš duollet dálle, muhto eanaš áiggi galget leat fierttut ja balvás dálkkit, muitala Larsen ja lasiha;
– Temperatuvra lea gaskal 10 ja 15 lieggagráda, ja bivvaleamos dálki lea Sis-Finnmárkkus.
68 jagi áigi go arvvi badjel 300 mm
Sihččatjávrris lea mihtidanstašuvdna leamaš 1912 rájes ja Guovdageainnus 1921 rájes. Maŋemus go Guovdageainnus lea mihtiduvvon arvi badjel 300 mm lei 1948:s. Dalle arvvii 313 mm. Sihččatjávrris lea maid dušše oktii mihtiduvvon arvi badjel 300 mm. 2010:s arvvii 310 mm.
