-Almmuhus-
-Almmuhus-
OĐĐASATBuot skuvlacehkiin duođaš­tuvvon korona­virus 

Buot skuvlacehkiin duođaš­tuvvon korona­virus 

-

-

Romssas suohkanis lassána covid-19 njoammun beaivvis beaivái ja olu nuorra olbmot leat fáhtehallan virusii. Dál čavge ja gáržžida suohkan vuot njoammuneastadannjuolggadusaid. 

Duorastaga leat Romssa gávpogis oktiibuot 78 olbmo sirrehusas maŋŋel go sis lea duođaštuvvon koronavirus. Pandemiija čuohcá erenomáš garrasit joatkkaskuvllaide.

– Kongsbakken joatkkaskuvllas lea guđa luohkás duođaštuvvon koronavirus, ja dat luohkát leat buot skuvlacehkiin. Oktiibuot lea covid-19 njommon 26 oahppái. Sálašvákki joatkkaskuvllas lea korona njommon guovtti oahppái ja maiddái Ishavsbyen joatkkaskuvllas lea duođaštuvvon korona ovtta oahpis. Mii leat gohččon Ishavsbyen joatkkaskuvlla giddet, dajai Romssa suohkana váldodoavttir Kathrine Kristoffersen preassakonferánssas. 

Dán vahkkus leat čađahan koronaiskosa buot Kongsbakken joatkkaskuvlla 700 oahppis ja odne isket ges buot Sálašvákki joatkkaskuvlla ohppiid. Goappašat skuvllat leat giddejuvvon ja sihke skuvlla oahppit ja bargit leat erremis.

Olu eambbo njoammun

Romssa koronaguovddáš lea čađahan badjel 1000 iskosa maŋŋebárgga ja gaskavahkku, ja beannot jándoris leat koronanjoammumat lassánan beliin. 

– Nuorra olbmuin leat hui olu lagasoktavuođat ja  sii fitnet sihke skuvllas, bargosajiin, gávpeguovddážiin ja feasttain. Danin jáhkkit ahte olu eanet olbmuide lea njommon koronavirus. Koronabuohccit bohtet lassánit Romssa gávpogis. 

Ii dohkket cielahemiid

Koronaleavvan ii leat áidna váttisvuohtan Romssa servodagas. Sátnejođiheaddji muitala ahte olbmot geaidda koronavirus lea njommon cielahuvvojit interneahtas. 

– Mii oaidnit ahte olbmot čállet fasttiid ja cielahit koronabuhcciid dárbbašmeattumit sosiála mediain ja aviissaid kommentárafealttain. Mun bivddán olbmuid heaitit dainna go dat váikkuha hejot njoammunguorramii. Eai buohkat duostta šat muitalit gos leamaš ja geaiguin leamaš fárrolaga maŋŋel go leat ožžon koronavirusa, logai sátnejođiheaddji Gunnar Wilhelmsen preassakonferánssas. 

Son dadjá maid ahte olbmot eai dárbbaš heahpanaddat go sidjiide lea covid-19 njommon. 

– Ii leat heahpat go olbmui njoammu koronavirus. Koronavirus sáhttá njoammut vaikke geasa vaikke gos. 

Romssa sátnejođiheaddji Gunnar Wilhelmsen ja suohkana váldodoavttir Kathrine Kristoffersen. Vuorkágovva Rune Stoltz Bertinussen/NTB
Romssa sátnejođiheaddji Gunnar Wilhelmsen ja suohkana váldodoavttir Kathrine Kristoffersen. Vuorkágovva Rune Stoltz Bertinussen/NTB

Ođđa doaibmabijut

Maŋŋel go korona leavvagođii Romssas, de lea suohkan jo čavgen gáržžedemiid árabut dán vahkkus. Olbmot ávžžuhuvvojit geavahit njálbmesuoji bussiin ja fatnasiin jus ii leat vejolaš doallat mehtera gaskka, olbmot ávžžuhuvvojit ráddjet lagas oktavuođaid logi olbmui vahkkus ja ruovttuide ii leat lohpi čohkket eanet go logi olbmo. Guossohanbáikkit ges galget buot olbmuid registreret. 

– Dál ávžžuhit maid šluhttet buot valáštallan- ja ástoáiggedoaluid mat leat jurddašuvvan gaskal 15–20-jahkásaš nuoraide jus ii leat vejolašvuohta doallat gaskkaid. Mii ávžžuhit maid ahte nuorat eai searvva valáštallangilvvuide eará guovlluin. Joatkkaskuvlla oahppiid bargohárjehallamiid ávžžuhit maŋidit ja nuorra olbmot berrejit dás rájes doallat unnimusat guokte mehtera gaskka olbmuide riskajoavkkus, lohká suohkana váldodoavttir Kathrine Kristoffersen, gii maid ávžžuha olbmuid oahpásmuvvat ođđa doaibmabijuide maid ráđđehus ovdanbuvttii odne. 

Lassi iskamat 

Romssa koronaguovddážis lea leamaš hirbmat olu bargu maŋŋel go njoammumat lassánišgohte. Dál áigot ražastit vel garraset. 

– Mii leat odne oahpaheamen 15 ođđa bargi čađahit njoammunguorramiid ja mii iskagoahtit vel eambbo olbmuid. Boahtte vahkkus ásahit maid mobiila iskanstašuvnna mainna johtit gávpotosiid mielde, muitala koronaguovddáža fágajođiheaddji, Øivind Benjaminsen. 

Olu searat, ođđa njoammuneastadannjuolggadusat ja olbmuid rahčamuš galggašii bissehit koronaleavvama Romssas. 

– Mun ádden ahte oallugat leat dolkan gáržžiidemiide ja ahte olbmot ballet go leat gártan erremii. Dál galgat ovttas soahtat koronavirusa vuostá ja dán gičču áigut vuoitit. Dasa gal jáhkkán, loahpaha Romssa suohkana váldodoavttir, Kathrine Kristoffersen. 

 

   

-Almmuhus-