Bohccobierggu márkanlávdegotti jođiheaddji John Anders Lifjell dieđiha buori jođu bohccobierggus, dušše ođđajagemánus vuvdui 100 tonna bohccobiergu.
Bohccobierggu márkanlávdegotti jođiheaddji John Anders Lifjell dieđiha buori jođu bohccobierggus, dušše ođđajagemánus vuvdui 100 tonna bohccobiergu.
Dál lea 545 tonna vuorkkás, ja Lifjellas lea buorre doaivva jođihit buot, nu ahte čakčamánu 1. beaivvi lea vel 100 tonna báhcán.
Čuođi tonna, mii galgá vel vuorkkás čakčamánu 1. beaivvi, lea biergu maid vel vuvdet ovdal go varas biergu álgá boahtit rámbuvrraide fas.
– 545 tonna orru hui olu, muhto dat ii leat. Jus buohtastahttá diimmážiin, 2015/2016 jahkemolsumis, lei 465 tonna biergu vuorkkás, dál mis lei measta 200 tonna eambbo, ja leat vuovdán 100 tonna mánus, lohká Lifjell.
Lassánan diimmážis
Ođđajagemánnu láve jaskes mánnu, lohká Lifjell, muhto liikká leat vuovdán nu olu bierggu. Dan sii eai lean rehkenastán ja vuordán, mii dahká ahte Lifjell lea hui positiiva. Su mielas orru buorre áigodat.
Dán jagi leat njuovvan olu, eanas boazodoallit vuvde čakčat. Dás rájes ii vuordde Lifjell vuorkái šat nu olu bierggu.
– Njuovvama dáfus lea 2016/2017 leamaš buoremus njuovvanjahki guhkes áigái, ii leat 2010/2011 rájes njuvvojuvvon ná olu.
Maiddái jođu dáfus lea jahki leamaš buorre. Mannan čavčča lassánii biergojohtu 6,2 proseanttain ovddit jagi ektui.
Lifjell ii duostta goit ge illudit nu beare haga, go márkan sáhttá rievdat.
– Lea leamaš hui buorre jahki dál, ja dasa lassin lea bohccobiergu hui bivnnut. Dat lea dearvvašlaš, ja luonddu buvtta, dat lea hui trendy dál, lohká son.
Ii bala čuožžumis vuorkkás
Lifjell ii jáhke vuorkkáid dievvat, ja bissut nu.
– Vuorkkát guorranit ovdal go divvet. Dat dieđusge ii ge leat buorre, go bohccobiergu galggašii álo leat rámbuvrras, vai olbmot oahpásnuvvet dasa. Nuppi dáfus lea buorre, go mearkkaša ahte bohccobiergu lea bivnnut, lohká márkanlávdegotti jođiheaddji.
