«Hackerat» dahje buijárat nihttet juohkit suoláduvvon álásgovaid Snapchatas – ja dán háve sii eai dájut, várre dáhkádusfitnodat.
Bággejupmi neahta badjel ii leat ođas, muhto ovdal lei dát dávjjibut dušše guoros nihttin, čállá Frende Forsikring preassadieđáhusas.
Sin dieđuid mielde lea lassáneaddji treanda ahte hackerat, buijárat, geavahit teknologiija mii gávdná beassansániid vai besset priváhta govaide Snapchatas. Dan maŋŋá oaffar oažžu SMS mas lea kopiija govas, ja nihttojuvvo máksit vai ii sáddejuvvo viidáset.
Vaikko máksá ge dan maid hackerat bivdet, de dat liikká ii dáhkit ahte sii heitet nihttimis ja diktet du ráfis, muitala dáhkádusfitnodat.
– Mii leat hállan nuorra almmáiolbmuiguin geat mákset máŋgga geardde, muhto liikká nihttojuvvojit, dadjá Tina Jerstad sihkkarvuođafitnodagas Tenerity.
Son rávve sin geat vásihit dákkáriid váidit dan politiijaide, iige máksit dan maid buijáriidda.
– Muitte dokumenteret visot. Vurke dieđuid maid oaččut, govve šearpma sihkkarastin dihte ahte vearredahku lea dáhpáhuvvan. (©NTB)
