Eambbo ja eambbo nuorat šaddet bargonávccaheapmin, muhto unnán sis leat dáhkidan iežaset sisaboađu. – Earret lasáhusaid, de fertejit birget gaskal 296 000 ja 324 000 ruvnnuin.
– Eai leat ollu nuorra olbmuin geain lea ain olles eallin vuordimis. It joavdda nu guhkás viessomárkanis dainna sisaboađuin, dadjá Frende Forsikring bargi Ole-Jørgen Kjenes preassadieđáhusas. Son bargá ráđđeaddinovdánemiin ja hupmá beaivválaččat kunddarráđđeaddiiguin miehtá riikka.
Ollu nuorra olbmot rahčet
– Nuorra olbmot jurddašit ahte sii leat birgemeahttumat eaige sáhte buohccát. Muhto dat dađi bahábut geavvá oallugiidda, geat eai leat ekonomalaččat sihkkarastojuvvon obanassiige, dadjá son.
NAV dieđuid miel ledje 21 500 bargonávccaheami, gaskal 18- ja 29-jahkásaččain, diimmá čakčamánu loahpageahčen. Dat leat dat ođđaseamos logut dán ektui.
– 21 500 olbmo dagahit 2,6 proseantta álbmogis dain ahkeluohkáin ja čájeha ahte dat ii leat konstruerejuvvon váttisvuohta. Eambbo ja eambbo nuorat šaddet bargonávccaheapmin. Lohku geat rahčet sihke fysalaš ja psyhkalaš váttuiguin geat eai leat bargonávccahisstatistihkas lea maid lassáneamen, dadjá Kjenes.
Nuorain lea eanemus manahit
Vaikko eallindáhkádus ii leat dat man birra studeanttat beaivválaččat hupmet,de lea dát joavku geain lea eanemus manahit jus šaddet ovdamearkka dihte bargonávccaheapmin.
– Váldoágga šaddat nu lea deahkke- ja lahttodávda, psyhkalaš dearvvašvuohta ja váibmo-varrasuotnadávda. Dat leat buozalmasvuođat maid mii buohkat sáhttit oažžut, vaikko goas eallimis, dadjá Frende-ráđđeaddi.
Unnán ruhta
Buorre bargonávccahisdáhkádus sáhttá leat studeanttaid buoremus investeren sihkkarastit boahtteáiggi sisaboađu.
– Go lea unnán dahje ii obanassiige bargovásáhus, de ožžot nuorra olbmot hui unnán álbmotoajus. Jeara alddát makkár eallima don sáhtát eallit 300 000 ruvdnosaš bálkkáin, dadjá Ole-Jørgen Kjenes.
Go leat nuorra ja lea dearvvašvuohta, de dakkár dáhkádus ii mávsse nu ollu.
– Mii oaidnit aŋkke ahte dat dáhkádus ii vuoruhuvvo studeantabušeahtas. Mun ipmirdan ahte šaddá nu go lea unnán studiedoarjja, allá viessohattit ja olu girjjit maid šaddet oastit. Dahje jus leat aiddo lávken bargoeallimii ja áigi lea nu gárži go dál lea, dadjá son.
– De ii leat nu miella geavahit ruđa dáhkádussii masa ii soaitte goasse atnu. Duohtavuohta lea ahte lea stuorát vejolašvuohta šaddat bargonávccaheapmin go ahte viessu buollá, dadjá Kjenes.
Dáhkidit iežaset diŋggaid
Ole-Jørgen Kjenes muitala ahte nuorat dávjá leat čeahpit dáhkidit iežaset diŋggaid, stohpogálvodáhkádusain, go fárrejit eret ruovttuin.
– Lea álki bidjat hatti juoga masa maid ieš eaiggáduššá. Don dieđát man olu dihtor ja mátketelefovdna mákset, dat leat divrasat. Muhto dat ii leat mihkke dan ektui mo livččii jus ii sáhtáše šat bargat. De lea stuora supmis sáhka jahkásaččat, iige dušše dan oktii go ođđa telefovnna šaddá oastit, dadjá son.
