Guovdageainnu sámiid searvi bovde rabas čoahkkimii Duohtavuođa- ja soabahankommišuvnna raportta birra.
Guovdageainnu sámiid searvi (GSS) lágida čoahkkima Guovdageainnus gos čilgejuvvo Duohtavuođa- ja soabahankommišuvnna raportta sisdoalu birra ja lea maid vejolaš juogadit iežas jurdagiid ja evttohusaid viidáset bargguid birra.
Čoahkkimii boahtá kommišuvdnamiellahttu, Liv Inger Somby čilget raportta sisdoalu. Maŋŋel ovdanbuktima lea rabas ságastallan raportta sisdoalu birra ja evttohuvvon doaibmabijuid birra.
– Sávvat oallugiid searvat čoahkkimii gullan dihte mii raporttas lea ja searvat ságastallamii dasa makkár vuordámušat Guovdageainnu álbmogis leat evttohuvvon doaibmabijuide, čállá GSS preassadieđáhusas.
– Dehálaš Guovdageainnus maid ságastallat
GSS deattuha ahte lea hirbmat dehálaš Guovdageainnus hupmat Duohtavuođa- ja soabadankommišuvnna raportta birra, go doppe lea maid dáruiduhttin garrasit čuohcan:
– Oallugiin leat vásáhusat dáruiduhttimis, sihke ovdalaš áiggi ja maiddái otná beaivvi, ja danne bovdet buot agi olbmuid searvat. Mii ságastallat dan birra mii boahtá raporttas ovdan, ja mii lea boahtte lávki. Leat go mii gergosat soabadišgoahtit obanassiige? Vai lea go dárbu vel eambbo fuomášumi bidjat dasa mii lea geavvan, ain geavvá, ja váikkuhusat mat leat?
Vuođđun cealkámuššii Sámediggái
GSS čilge ahte duogážiin go lágidit čoahkkima lea go Sámediggeráđđi lea bovden sámi servodaga searvat gulaskuddamii ja buktit oaiviliid raportta sisdoalu birra ja evttohuvvon doaibmabijuid birra.
– Báikkálaš máhcahagaid ja digaštallamiid vuođul áigu Guovdageainnu sámiid searvi buktit gulaskuddancealkámuša Sámediggái, čállá GSS ja fuomášuhttá ahte sii eai áiggo siteret ovttage gii váldá sáni čoahkkimis.
Čoahkkin lea mánnodaga golggotmánu 9. beaivvi diibmu dii. 18:00 – 20:30, Diehtosiiddas.
GSS namuha vel ahte jus it sáhte searvat čoahkkimii, muhto aŋkke háliidat buktit máhcahagaid, sáhtát daid sáddet GSS:i.
