Noereh lágida jahkečoahkkima boahtte vahkkoloahpa ja ávžžuha miellahtuid dieđihit oassálastima.
Cuoŋománu 28.–30. beivviid lágiduvvo sámi nuoraidorganisašuvnna Noereh jahkečoahkkin Troandimis.
Jahkečoahkkin lea organisašuvnna miellahtuid várás geat leat gaskal 13–30-jagi. Jahkečoahkkimis lágiduvvojit bargobájit, guoimmuheamit ja mállásat. Organisašuvdnii válljejit maid ođđa stivralahtuid.
Noereh gokčá oasseváldiid mátkegoluid, orruma ja biepmu. Iežasoassi máksá 250 ruvnno. Noereh ávžžuha nuoraid dieđihit iežaset jahkečoahkkimii.
Noereh lea sorjjasmeahttun sámi nuoraidorganisašuvdna mii ovddida nuoraid áššiid ja láhčá deaivvadanbáikkiid sámi nuoraid várás.
