Áidna prošeakta Norggas mii lea bovdejuvvon Berlinale co-productions Marketii dán jagi, lea sámi mánáidfilbma.
Áidna prošeakta Norggas mii lea bovdejuvvon Berlinale co-productions Marketii dán jagi, lea sámi mánáidfilbma.
Filmma, man lea gohčodan «Sáve», lea guovdageaidnulaš Jens Martin Mienna čállán.
Dat lea Fantasy-šáŋra filbma mánáide, ja lea válljejuvvon ovtta Eurohpá deháleamos internašunála filbma ruhtadan- ja vuovdinmárkaniidda, nammalassii Berlinale Co-Production Market doaluide.
Rámis
– Mun lean ilus ja rámis go prošeakta geasuha fuomášumi ovtta máilmmi buot deháleamis filbmafestiválain. Go dát válljejuvvo čuohteviissa eará prošeavttaid gaskkas, de oainnán dán mearkan das ahte giehtačállosis ja prošeavttas lea alla kvalitehta. Dát lea njulgestaga kvalitehtasteampalin prošektii, dadjá mánusčálli Jens Martin Mienna preassadieđáhusas.
Son lohká dán movttiidahttit iežas.
– Lea čielggas ahte dát šáŋra, sámi iešvuohta ja dát muitalus geasuha ja boktá sáhkiivuođa filbmaindustriijas. Dat movttiidahttá mu persovnnalaččat joatkit ja ráhkadit ođđa ja miellagiddevaš muitalusaid main lea vuolggasadji sámi birrasis, máidnasiin ja kultuvrras, lohká Mienna.
Várálaš mátki
Sáve filbma lea sámi nieidda birra guhte gelddolaš ja váralaš mátkkis deaivvada sámi máinnasfiguvrraiguin nu go stáluin ja eará eatnanvuole ássiiguin.
Filbmaprošeakta lea leaamaš The End AS fitnodaga ovdánahttimis badjel jagi, ja lea ožžon doarjaga Internašunála Sámi Filbmainstituhtas ja Filmfond Nord foanddas.
– Prošeakta lea ain miellagiddevaš ovdánahttindilis, ja lea okta dain filbmaprošeavttain mas lea allageamos mihtut sámi filbmabuvttadan birrasis, dadjá buvttadeaddji Khalid Maimouni.
Maimouni muitala iežaset bargat stuorra bušeahtain, ja plána mielde filbmegohtet 2019/20:s.
– Prošeakta lea aiddobáliid ožžon fuomášumi muhtin TV-kanálas, gos áiggošedje geavahit filmma ráido-hámis. Dát responsa inspirere bisuhit daid alla mihtuid mat mis leat sámi myhtalaš máilmmi dáfus, lohká son.
