Eai goassege ovdal leamaš nu olu alit oahpu studeanttat go dál, ja okta oahppu geasuha erenomáš olu studeanttaid.
Juohke logát studeantta gazzá bacheloroahpu ekonomiija ja hálddahuslaš fágas. Dát oahpposuorgi lei eanemus bivnnut 2020:s, ja dat geasuha guktot sohkabeliid. 8 proseantta nissoniin ja 13 proseantta dievdduin geat gazzet alit oahpu ledje álgán ekonomiija ja hálddahuslaš fága ohppui diibmá.
Nubbin bivnnuheamos oahppu lea bachelorgráda servodatfágas ja juridihkalaš fágas. Buohccedivššároahppu ges geasuha goalmmát eanemus studeanttaid. Guktot oahpuid leat badjel 5 proseantta Norgga studeanttain válljen 2020:s, čájehit Alit oahpu studeanttaid logut.
Studeanttat lassánit
Norggas lassánit studeanttat ja vuosttaš gearddi historjjás registrerejuvvojedje diibmá badjel 300 000 alit oahpu studeantta.
Oktiibuot ledje 306 400 studeantta 2020:s, mii lea 10 200 eanet go ovddit jagi.
Sohkabeliid ektui leat ain eanemus nissonolbmot geat váldet alit oahpu. 40 proseantta studeanttain leat dievddut ja 60 proseantta ges nissonolbmot.
96 proseantta dáin studerejit Norggas ja 4 proseantta ges olgoriikkain, čállá Statistihkalaš guovddášdoaimmahat.
