Dán jagi čađahuvvo fuođđobivddu báhčingeahččaleapmi nugo dábálaččat.
Dán guokte maŋemus jagi ja pandemiijaáigodagas lea fuođđobivddu báhčingeahččaleapmi rievddadan, muhto dán jagi šaddet buot bivdit čađahit goappašat osiid báhčingeahččaleamis. Pandemiijaáigge leat gáibádusat leamašan ložžejuvvon njoammuneastadanákkaid geažil, dan dieđiha Birasdirektoráhtta.
Norggas lea mearri ahte buohkat geat bivdet stuora elliid, nugo ovdamearkka dihte ealggaid, galget jahkásaččat váldit báhčingeahččaleami dohkkehuvvon báhčinšiljus.
– Báhčingeahččaleapmi lea dehálaš oassi kvalitehtasihkkarastimis ja ráhkkaneamis bivdui. Danne lea buorre go mii dál fas beassat dábálaččat čađahit geahččaleami, dadjá Birasdirektoráhta direktevra, Ellen Hambro, preassadieđáhusas.
Báhčingeahččaleamis leat guokte oasi. Vuosttaš oasis galget bivdit báhčit vissis meari láttaid báhčinšiljus, ja nuppi oasis ges galget báhčit eallifiguvrraid njeaiga ja deaivat buot láttaid mearriduvvon rieggá sisa. Diibmá eai dárbbašan bivdit čađahit eará go maŋit oasi báhčingeahččaleamis.
