Sámediggi dáhttu sámi guovlluin eanet cealkámušaid, danne go lea dehálaš oažžut buriid, konstruktiiva árvalusaid movt sámi rekrutteren galggášii lasihuvvot ja nannejuvvot.
– Don sáhtát buktit cealkámušaid du iežat ovddas, muhtun organisašuvnna ovddas dahje muhtun skuvlla ovddas, čállá Sámediggi.
Gielda- ja guovlodepartemeanta ja Máhttodepartemeanta háliidit cealkámušaid jahkásaš stuoradiggedieđáhussii sámi giela, kultuvrra ja servodateallima birra, mii galgá leat rekrutterema ja gelbbolašvuođa birra.
Stuoradiggedieđáhus galgá ovdanbuktojuvvot 2023 giđa. Áigemearri buktit cealkámušaid lea juovlamánu 15. beaivvi dán jagi.
Ferte váldit duođas
– Sámi giela ja kultuvrra gelbbolašvuođa váiluma fertet mii buohkat váldit duođas, čállá Sámediggi.
Danne lea ráđđehus ja Sámediggi mearridan ahte boahtte stuorradiggedieđáhus sámi giela, kultuvrra ja servodateallima birra galgá gieđahallat rekrutterema ja gelbbolašvuođa. Das áigu ráđđehus geahčadit mánáidgárddiid, vuođđooahpahusa ja alit oahpu lagabui.
Cealkámuščoahkkimat
Gielda- ja guovlodepartemeanta lea juo lágidan cealkámuščoahkkimiid, vuosttaš čoahkkimat dollojuvvojedje Romssas ja Guovdageainnus. Skábmamánu 30. beaivvi lágiduvvo cealkámuščoahkkin Levangeris.
