Várjjagis bissehedje 10 ruoššaluosamearddi measta buot dan 100 000 ruoššaluosa beassamis mat geahččaledje beassat guovllu jogaide gođđat.
– Bajábeale ruoššaluossamerddiid eat leat muhtin jogain oba gávdnan ge ruoššaluosa ja dat čájeha ahte lea vejolaš bissehit ruoššaluosa, lohká Birasdirektoráhta seniorneavvu Eirik Frøiland.
Birasdirektoráhta ja Romssa ja Finnmárkku stáhtahálddašeaddji leat dán geasi ruhtadan ruossaluossamerddiid mat ledje ceggejuvvon 30 johkii Finnmárkkus, eastadan dihtii amas guollešlája, ruoššaluosa, beassamis gođđat Atlántta luossanáli jogaide. Dasa lassin leat eaktodáhtolaš searvvit leamaš mielde dán barggus 60 eará jogas oarjeleappos.
Buokčit leat iskan dán logi jogas Nuorta-Finnmárkkus mo dilli lea. Čieža jogas oktiibuot logi jogas gávdne vuollel 200 ruoššaluosa bajábeale merddiid ja golmma jogas dan logi jogas eai gávdnan go vihtta ruoššaluosa mat ledje beassan meattá.
