Sii geat oaivvildit ahte Norggas leat beare garra koronanjuolggadusat lea veaháš lassánan, čájehit ođđa iskkadeamit. Sullii bealli oaivvildit ahte koronapandemiija bistá suoidnemánu rádjái.
Dát logut bohtet ovdan vahkkosaš iskkadeamis maid Infacts čađaha koronadoaibmabijuid birra Norggas, iskkadeamit čađahuvvojit Nettavisena ja Amedia ovddas.
3098 olbmo leat jearahuvvon mánnodaga iskkadeamis ja 14,4 proseantta sis vástidit ahte leat beare ollu doaibmabijut Norggas. Dat lea 1 proseantapoeŋga lassáneapmi dan guovtti maŋemus vahkkus.
Eanas Nordlánddas oaivvildit ahte doaibmabijut leat beare garrasat ja Agder ja Rogaland leaba das maŋábealde dienna oaiviliin. Unnimus lassáneapmi geat oaivvildit ahte doaibmabijut leat beare garrasat lea Vestlánddas ja Innlánddas.
Ain lea olbmuin luohttevašvuohta eiseválddide ja leat unnit olbmot geat vástidit ahte sii ballet heakka, healssu, ekonomiija ja boarrásit fulkkiid dihtii.
48,6 proseanta vástidit ahte sii jáhkket ahte koronapandemiija bistá gitta suoidnemánu rádjai, 18,6 proseanta oaivvildit ges ahte dat bistá máŋga jagi ja 14,5 proseanta oaivvildit ahte koronapandemiija bistá geassái.
– Unnán doaibmabijut
Mánnodaga logut čájehedje ahte leat unnit olbmot geat oaivvildit ahte eai leat doarvái doaibmabijut Norggas. 12,6 proseanta vástidedje ahte leat beare unnán doaibmabijut, mii lea njiedjan ovddit vahkku rájes gos logut ledje 15,8 proseanta. Romssas ja Finnmárkkus oaivvildit ahte doaibmabijut leat beara geahnoheamet.
Obbalaččat leat norgalaččat hui duhtavaččat eiseválddiiguin. 66,9 proseanta oaivvildit ahte leat biddjon johtui doarvái doaibmabijut, dat lea lassáneapmi ovddit vahkkus gos logut ledje 64 proseanta.
(©NTB)
