Odne iđđedis Seastinbáŋku 1 Davvi-Norggas vásihedje váttisvuođaid bileahttavuogádaigain Glød konseartii mii galgá lágiduvvot Romssas loahpageahčen dan mánu.
Seastiŋbáŋku 1 Davvi-Norgga ruovttusiiddus boahtá ovdan ahte bileahttavuogádat ii doaibman odne jo diimmu ovccis iđđedis go almmuhedje nuvttá konseartabileahtaid addima.
– Lea hui somá go lea ná stuorra beroštupmi dáhpáhussii, ja mii šállošit go eat nagodan sihkkarastit rivttes láhkái vuovdima, čilge bileahttavuogádaga lágideaddji Seastinbáŋku 1 Davvi-Norga.
Seastinbáŋku 1 Davvi-Norga neahttasiiddus čállet ahte áddet bileahttavuogádaga lágideaddjái ráfis bargat.
Galgá fas vejolašvuohta viežžat Glød dáhpáhussii bileahta 18.00 rájes odne.
ISÁK lea mielde
Glød konsearta lea nuvttá musihkkadáhpáhus Romssa gávpogis mii lágiduvvo čakčamánu 24. beaivvi dii.17.30 ja 22.00 gaskka. Glød lávddis galget čuojahit earet eará Karpe, Dagny, ISÁK ja RSP & Thomax.
– Olu konsearttain lea 18-ahkerádji. Mii diehtit ahte nuorat háliidit maid oassálastit dáhpáhusain. Danin mii leat mearridan ahte mis ii leat makkár ge ahkerádjá. Lágideapmi lea alkoholakeahttá, čállá Seastinbáŋku 1 Davvi-Norga ruovttosiidus konseartta birra.
Báŋkkus deattuhit ahte konsearta aŋkke ii leat jurddašuvvon mánáide. Jus konsertii boahtá vuolel 15-jahkásaš mánná, de sus fárus ferte leat váhnen.
Seastinbáŋku 1 Davvi-Norga vuordá gitta 20 duháha olbmo konsertii.
