Báŋkokundarat oidnet árvvu válljet Davvi-Norgga báŋkooktavuođa. Dat addá Seastinbáŋku 1 Davvi-Norgii alla ja gánnáhahtti lassáneami vuosttaš jahkebealis.
Davvinorgga báŋkkuin leat njealji máŋgimuš jagis lassánan gávpemárkanoasit 15 proseanttain, čájeha iskkus man Kantar TNS lea dahkan.
– Mii jáhkkit ahte ollugat leat vásihan ahte Davvinorgga báŋkkut sihke nášunála ja internášunala dasis birgejit bures. Ággan dasa sáhttá leat ahte sis leat bálvalusfálaldagat ja innovašuvdna. Oktavuohta kunddariide ja báikkálaš servodahkii lea dehálaš, dadjá Seastinbáŋkku 1 Dávvi-Norgga konseardnahoavda Jan-Frode Jansen.
Čájehuvvo rehketdoalus
Gaskavahku ovdanbuvttii Seastinbáŋku 1 Davvi-Norga vuosttas dán jagi jahkebeali rehketdoalu. Logut čájehit ahte doaibmaboađus ovdal vearu lea 831 miljovnna ruvnnu, 63 miljovnna eambbo go diibmá seamma áigodagas.
– Boađus vuosttaš jahkebealis leat buorit, ja lea dan dihte go lea buorre ekonomalaš ovdádeapmi Davvi-Norggas. Mii oažžut mávssu strategalaš válggaid ovddas, go mii šaddadit Davvinorgga doaimma, muitala Janson.
Golut leat unniduvvon 0,5 proseanttain, jus galgá buohtastahttit gaskamearálaš goluin 2016:s. Loatnatáhpat leat seamma dásis go diibmá.
Báŋkodoaimmahusas lea Seastinbáŋku 1 lassáneapmi juohke sajis.
– Jus galgá buohtastahttit 2016:in, de lea mis vuovdin lassánan 73 proseanttain. Fitnodatmárkánis lea lassánan 40 proseanttain, nu ahte njuolla čujuha bajás, lohká konseardnahoavda.
