Beaivváš Sámi Našunálateáhterii geigejuvvui 2016 Hedda-bálkkašumi gudnekategoriijas «Erenoamáš dáiddalaš bargu» mannan sotnabeaivvi. Lea Norgga teáhtermáilmmi stuorámus bálkkašupmi.
Beaivváš Sámi Našunálateáhterii geigejuvvui 2016 Hedda-bálkkašumi gudnekategoriijas «Erenoamáš dáiddalaš bargu» mannan sotnabeaivvi. Lea Norgga teáhtermáilmmi stuorámus bálkkašupmi.
Beaivváš Sámi Našunálateáhterii geigejuvvui mannan sotnabeaivvi, geassemánu 12. beaivvi, 2016 Hedda-bálkkašumi kategoriijas «Erenoamáš dáiddalaš bargu». Beaivváža teáhterhoavda Rolf Degerlund lei Nationálateáhteris váldimin vuostá bálkkašumi.
– Lei erenoamáš illudahtti oažžut Hedda-bálkkašumi «Erenoamáš dáiddalaš bargu» mii lea dat fiidnámus man oppanassii sáhttá oažžut. Lea gudnebálkkašupmi. Lean hirbmat rámis. Mearkkaša hirbmat olu sidjiide geat lea ráhkadan «Vidas Extremas» čájálmasa ja olles sámi kultuvrii. Buohkat leat bargan erenoamáš buori barggu. Hedda-bálkkašupmi lea buorre politihkalaš ágga manin Beaivváš Sámi Našunálateáhter ánssáša ja dárbbaša teáhterviesu, lohká Beaivváža teáhterhoavda Rolf Degerlund.
Ikte eahkedis čohkkii son buot Beaivváža bargiid, čájehan dihtii Hedda-bálkkašumi.
– Hui somá teáhterii ja bargiide diekkár ánssu oažžut, lohká Beaivváš Sámi Našunálateáhtera diehtojuohkki Aslak Mikael Mienna.
Ánssášit ođđa teáhterviesu
Sámedikki ráđđelahtu Henrik Olsena mielas deattuha Hedda-bálkkašupmi Beaivváš Sámi Našunálateáhtera dárbbu oažžut ođđa teáhterviesu go sii ánssášit ahtanuššat. Muhto ahtanuššama stuorámus hehttehus lea go váilu dohkálaš teáhterviessu.
– Hedda gudnebálkkašupmi duođašta ahte Beaivváš Sámi Našunálateáhteris lea alla kvalitehta sin barggus. Hedda-bálkkašumi árvvu lea veadjemeahttun árvvoštallat. Hedda-bálkkašupmi čájeha ahte teáhteris lea stuorra dáiddalaš ja sorjjasmeahttun kvalitehta. Lea politihkkáriid geatnegasvuohta ruhtadit ođđa teáhterviesu, lohká Sámedikki ráđđelahttu Henrik Olsen ja lohká Hedda-bálkkašupmi lea buoremus márkanfievrredeaddji.
– Áiggun beaškalit dan beavdái
Beaivváža teáhterhoavda Rolf Degerlund lohká amma juo Hedda gudnebálkkašumi ákkastallamiin oažžu Beaivváš Sámi Našunálateáhter ođđa teáhterviesu ja sus lea buorre doaivva.
– Áiggun Hedda beaškalit beavdái. Lea heahpat jus njunušpolitihkkárat eai ádde ahte mis lea dárbu ođđa teáhtervissui. Sámedikkis lea buorre gulahallan Stuorradikkiin. Guovdageainnu suohkan bargá maid áššiin. Beaivváš Sámi Našunálateáhter čoahkkinastá Stuorradikkiin boahtte čavčča. Soaitá dalle luovvanit, lohká Beaivváš Sámi Našunálateáhtera hoavda Rolf Degerlund.
