Okta geasi stuorámus digaštallamiin lea davviriikkalaš borrandábiráđiid birra, mat hásttuhit olbmuid borrat unnit oamibierggu guoddevašvuođa dihte. Guovddášbellodat oaivvilda ahte borramušbuvttadeapmi ferte leat gitta báikkálaš dilis.
Guovddášbellodat oaivvilda borramušbuvttadandilli lea eará Norggas go ollu eará riikkain ja ahte dan eai leat muitán árvvoštallat go leat buktán ráđi.
– Dánmárkkus lea 66 proseantta gilvon eana ja Norggas lea dušše 3. Reasta min riikkas lea eanaš meahcci maid biebmoeallit sáhttet ávkkástallat, ja danin lea Norgga oamibiergu dehálaš oassi min borramušas. Biebmoelliid klimágássaluoitin lea uhcci, elliidčálggu gáibádusat Norggas leat streaŋgásat ja lea unnán medisiidnageavaheapmi borramušbuvttadeamis Norggas buohtastahtton eará riikkaiguin, čálliba Guovddášbellodaga stuorradiggeáirasat Nils Bjørke ja Siv Mossleth lohkkiidreivves.
Čálliba ahte go Putin sáhttá unnidit máilmmi borramušlihti de berrešedje buohkat oaidnit biebmolasáhusa ja biebmodustehusa mearkkašumi. Guovddášbellodaga mielas lea suddu go Norgga nákca buvttadit borramuša ii leat vuhtiiváldon borrandábiid ráđis.
– Mii dárbbašat stuoridit eanandoalu borramušgálvvu biebmolasáhusa Norggas. Guoddevašvuođas lea sáhka guhkitáigásašvuođas ja geavahit resurssaid dakkár láhkai ahte mii sáhttit dainna eallit guhkit áiggi. Heaitit borramis dahje borrat unnit oamibierggu vai buhttet olgoriikkagálvvuid lea sihke hearkkes ja oanebutáigásaš čoavddus. Dat dahká min eambbo sorjjasin olgoriikkagálvvuide, dan sadjái ahte ieža váldit ovddasvástádusa ja veahkehit máilmmi borramušlihti, čálliba Bjørke ja Mossleth.
