Sámi Našunálateáhter Beaivváš lea dál bargagoahtán dán teáhterjagi maŋemus buvttadusain namalassii «Snøfrid» čájálmasain
Bihttá lea dramatihkkár Arne Berggren lea čállán. Dát lea teáhtera guđát álgočájálmas dán teáhteráigodagas ja álgočájálmas lea ođđajagemánu 12. beaivvi, Guovdageainnus.
«Snøfrid» čájálmasas leat mielde 7a neavttára, ja leaba Ingá Márjá Sarre ja Ánte Siri geat neaktiba váldoruollaid; Svåsenieidda Snøfrida ja Gonagasa Harald Hårfagre.
Snorre gonagasmuitalus
«Snøfrid» čájálmas lea čállon Snorre gonagasmuitalusa vuođul, mii gávdno Heimskringla girjjis, ja muhtin kapihttalis Harald Hårfagre ságámuitalusas, muitala Snorre Haralda gaskavuođaid birra nuorra sámi niidii Snøfridii, guhte lei sámegonagasa Svåse nieida. Norgga gonagas Harald, guhte šattai dovddusin «Hårfagre» namain, ráhkásnuvai čáppa Snøfridii ja hilggui iežas gonagaslaš geatnegasvuođaid ja náitalii suinna ja ásaiduvai sápmelaččaid lusa.
Dramatihkkár Arne Berggren lea čállán dán historjjá dramáhtalaš muitalussan fápmoriidaleami, juonalašvuođa ja ráhkisvuođa nana magihkalaš fámu birra.
Teáhtera ovddeš hoavda, Haukur J. Gunnarsson, lea bihtá bagadalli ja su bagadallanveahkki lea Elle Sofe Henriksen, gii maiddái lea bihtá koreográfa.
Biktasiid hábme Berit Marit Hætta, geainna Teáhter earret eará vuittii Hedda bálkkašumi buoremus bivttashábmema ovddas jagi 2000s.
Lávdehábmejeaddjit leaba Bård Torbjørnsen ja Maja Von Hanno, Čuovgahábmejeaddji lea Steinar Lohne, Muohtovuoidi lea Trude Sneve ja Šuokŋadahkki lea Olav Johan Eira.
Álgočájálmas: 12.01.18 Guovdageainnus. Dán dieđiha teáhter preassadieđáhusas.
