– Mu mielas ii leat dá váttis bargu go diehtá man birra galgá čállit, dadjá Ayla Gáren Audhild P. Nutti.
Dán vahkku lea Ávviris bargohárjehalli. Ayla Gáren Audhild P. Nutti lea 13-jahkásaš ja vázzá Gárasavvona skuvlla 7. luohkás, Ruoŧa bealde. Sis lea dál bargohárjehallanvahkku, ja leat ieža beassan válljet makkár bargobáikkis áigot geahččalit bargat.
Ayla Gáren bargá Guovdageainnu doaimmahusas Ávviris, ja čállá smávva áššážiid aviisii.
– Mu mielas ii leat dá váttis bargu go diehtá man birra galgá čállit. Sáhttá leat veahá váttis hutkat bajilčállagiid ja ingreassa, muhto ii leat nu ahte diibmoviissaid šattan čohkkát ja jurddašallat. Dat manná bures, dadjá son.
Ayla Gáren lohká iežas liikot čállit ja lohká danne háliidit geahččalit journalistan bargat.
– Mun háliidin geahččalit veahá earálágan barggu.
Dakkár bargu mainna boahtteáiggis sáhtášii bargat
Ávviris lea Ayla Gáren beassan ráhkadit mánáidsiidduid, čállit unna áššážiid, čállit albma ášši báberaviisii ja maiddái govvet ieš.
– Dá gal lea dakkár bargu maid boahtteáiggis sáhtášin maid bargat, go orru hui somá. In livčče gal gillen dáppe jus in loavttáše, boagusta son.
