-Almmuhus-
MAGASIIDNA– Oahpaheaddjin lea somá bargat

– Oahpaheaddjin lea somá bargat

-

-

Guovdageainnu ovccát luohkás lea dán vahkku bargovahkku. Bargovahkku  galget nuorat mannat bargat veaháš juohke sajis ja galget oažžut oainnu mot lea leat bargoeallimis.

 

Ollu oahppit vulget eret Guovdageainnus go lea bargovahkku, bargan dihte ealu luhtte dahje ruovttuin. 

Muhtin oahppit válljejit bargat fitnodagain, nu go Áilu Somby Sackey, gii lea Diehtosiidda teknologiijaossodagas. Ieš gal dadjá ahte liiko leat doppe ja sáhtášii vel bargat viidáset dainna.

–Liikon leat dáppe danin go liikon teknologiijai, dadjá Áilu, gii lea oahppan kámeraheivehemiid bidjat ja bidjat appaid dihtorii.

(Ášši joatka gova vuolde)


LIIKO TEKNOLOGIIJAI: Áilu lohká liikot teknologiija oahppat. Sara Alice Gaup

 

Liiko hupmat olbmuiguin

Sondre Biti Sandvik lea fas Coop Jernvare gávppis, gos son oahppá movt rámbuvrras galgá bargat.

–Lea somá bargat, beassá bargat poasttain, vuovdit ja čorget veahá, muitala Sondre.

Sondre gal áigu bargat viidáset  jus lea vejolaš danin go lea su mielas somá ja beassá humadit earáiguin.

(Ášši joatka gova vuolde)


BEASSÁ HUPMAT OLBMUIGUIN: Sondre liiko bargat rámbuvrras ja poasttas, gos beassá hupmat olbmuiguin. Sara Alice Gaup

 

 

Ožžon eará oainnu oahpaheddjiide

Muhtumat leat válljen barggu maid earát eai vállje. 

John Lennart Turi lea bargame oahpaheaddjin Guovdageainnu mánáidskuvllas.

–Dán idea ožžon oappás go son jearai áiggun go mun leat oahpaheaddjin, lohká John Lennart.

Son muitala ahte lea somá ja son lea leamaš ollu luohkáin ja lea ožžon eará oainnu oahpaheddjiide. Son lei jáhkkán ahte lea hui váttis, muhto lea álki danin go oahppit barget suinna ovttas eai ge su vuostá. Son gal sáhtášii bargat dainna viidáset.

 

Háliida šaddat spesialistan eŋgelasgielas

– Šaddat spesialistan eŋgelasgielas gal livččii álki, mun han lean speallan olles iežan eallima ja lean buorre eŋgelasgielas, oaivvilda John Lennart.

Oahppit leat fitnodagain olles vahkku, ja galget muitalit skuvllas skuvlavieljaide, skuvlaoappáide ja oahpaheaddjái movt lei bargat ja maid sii ohppe dán vahkku.

 

Sara Alice Gaup

 

Sara Alice Gaup vázzá Guovdageainnu nuoraidskuvllas 9. luohkás ja lea dán vahkku bargohárjehallamis Ávviris. 

 
-Almmuhus-