– Somá bargohárjehallamis

Tromssa Sámeskuvlla C-luohká (nuoraidskuvlla dásis) oahppit leat dán vahkkus bargohárjehallamis fitnodagain.

C-luohkás eai leat go guokte oahppi, ja dán vahkus lea nubbi sudnos Øverbygd filmcampas Málatvuomis ja nubbi Ávvira doaimmahusas Kárášjogas.

Oahppan olu

Olivia Johanne Fossli (15) lohká iežas loaktit filmcampa bargohárjehallamis.

– Mu mielas lea hui somá, go lean oahppan hui olu biepmuid birra maid in diehtán ovdal, muitala son.

Dássážii lea son olu beassan geahčalit.

– Dán rádjái lean rádjan biepmuid mat leat boahtán deike, iđitbiepmu ráhkadan, bassan láhttiid, málestan, bassan bevddiid ja nu ain viidásat, čilge Olivia.

Soaitá biebmolinjái

Olivia vázzá 10. luohkás ja galgá boahtte jagi álgit joatkkaskuvlii.

Son lean árvvoštallan ohcat biebmolinjái ja danne jurddašii ahte geahččala álggos koahkabarggu.

– In leat áibbas sihkar vel ozan go biebmolinjái, soaittán, lohká son.

Čendisat Málatvuomis

Øverbygd filmcamp lea báiki gos ráhkadit filmmaid ja maiddái gos neavttárat, rešissevrrat, stylisttat, koahkat ja eará filbmabargit orrot. Øverbygd filmcamp lea Málatvuomis.

Dan filmcampas leat ráhkadeamen ođđa filmma, «Black Frost», mas lea 200 miljovnna ruvdnosaš bušeahtta.

Olivia lohká oaidnán čendisaid, dan botta go lea doppe bargan.

– Na lean, mun in muitte sin namaid, čaibmá son.

Tromssa Sámeskuvlla C-luohká nubbi oahppi, Isak Nils Anders Eira (14), lea bargohárjehallamis Ávviris Kárašjogas.