-Almmuhus-
-Almmuhus-
OĐĐASAT Baján čeargu skábman

Baján čeargu skábman

-

-

Lávlagiin speadjalastiba bassi sullo suhtu.

Amoc ja Ailu Valle singel, «Horagállis», almmustuvvá gaskaija 30.12. «Horagállis» mearkkaša davvisámegillii «bajána ipmil».

– Anáraččaid bassi Äijih suolu lea jahkelogiid áigge gutnehuhttojuvvon turistačuozáhahkan,  čállá Uksi Productions preassadieđáhusas. Bihttá speadjalastá Äijih buđđosan suhtu, artisttat muitaleaba. Anárjávrri Äijih suolu lea čakčat giddejuvvon turisttain ja beassá leat dál ráfis.

Vuosttas singel skearrus

Preassadieđáhusas maid boahtá ovdan ahte artisttain lea boahtimin boahtte jagi skearru, mii lea máilmmi vuosttamus olles skearru guhkkosaš musihkalaš duodji guovtti sámegillii, anáraš- ja davvisámegillii. «Horagállis» lea skearru vuosttas singel.

– Horagállisa refreaŋŋa lea duođaštus das, ahte anárašgiella ja davvisámegiella čudjet bures oktii, Ailu lohká preassadieđáhusas ja joatká:

– Refreaŋŋa ii leat dušše guokte rappara vurrolagaid, muhto baicce ovttalaš muitalus, joatká Amoc.

Bihtá vearssat leat persovnnalabbot, go maid guldaleaddjit leat dáid artisttain hárjánan gullat, čállá Uksi Productions preassadieđus.

Beakkálmasat

Bihtá lea buvttadan riikkaidgaskasaččatge beaggán buvttadeaddji Juan Muteniac, guhte lea dovddus earret eará Amerihká Army of the Pharaohsiin ja Suoma Asain dahkkon ovttasbarggus. Olggosaddin doaibmá ođđa sápmelaš buvttadanfitnodat Uksi Productions. Bihtá musihkkavideo almmustahttojuvvo seamma beaivve Amoc YouTube -kanálas ja artisttaid somekonttuin. Musihkkavideo lea govven ja čuohppan nuortalaš Ville-Riiko Fofonoff. Bihtá olggošgova lea ráhkadan Robin Francett.

Artistat

Amoc, dahjege Mikkâl Morottaja, lea 35-jahkásaš anáraš rap-artista, doaimmaheaddji ja mediasuorggi ámmátolmmoš. Son lea ráhkadan rap-musihka anárašgillii badjel 20 jagi ja su vuosttas album Amok-kaččâm almmustahttojuvvui jagis 2007.

Ailu Valle lea 35-jahkásaš rap-artista Anáris, guhte rappe davvisáme-, suoma- ja eaŋgasgillii. Son lea almmustahttán golbma soloalbuma davvisámegillii, «Dušši dušše duššat» (2012), «7» (2015) ja «Viidon sieiddit» (2019). Valle oaččui Mánáidkultuvrra Stáhtabálkkašumi jagis 2019, man mieđihii Taike, ja Jagi buoremus bihtáčálli bálkkašumi, man mieđihii Sámi Music Awards ja Norgga TONO jagis 2020,  čállá Uksi Productions preassadieđáhusas.

-Almmuhus-